सोसायटीचा मैला थेट नाल्यात

सोसायटीचा मैला थेट नाल्यात
वसई-विरार महापालिका परिसरातील प्रकार
विरार, ता. ११ (बातमीदार)ः वसई-विरार महापालिका क्षेत्रात घनकचरा व्यवस्थापनाची अंमलबाजावणी होत नाही. कचरा व्यवस्थापनाचा दर्जा ढासळलेला असताना पालिका क्षेत्रातील रहिवासी सोसायट्यांचा जमा होणारा मैला सांडपाणी पुनप्रर्किया केंद्राऐवजी थेट नाल्यात सोडण्यात येत आहे.
वसई-विरार शहर महापालिकेद्वारा सांडपाण्यावर ‘प्रक्रिया केंद्रात` प्रक्रिया केली जात असल्याचे पालिकेने म्हटले आहे. शहरातील रहिवासी संकुलांच्या सेप्टीक टँकमधून मैला जमा करण्यासाठी वसई-विरार महापालिकेने कोट्यवधींच्या सक्शन कम जेटिंग मशीन खरेदी केल्या आहेत. मागणीनंतर एक हजार रुपये मूल्य आकारून महापालिका रहिवासी सोसायटींना सेवा देते. नालासोपारा-प्रगतीनगर येथील मोठा नाला तसेच विरार-मनवेलपाडा नॅशनल स्कूल परिसरातील भूमिगत गटारांशेजारी सक्शन कम जेटिंग मशीनमधून मैला सोडण्यात येतो. रात्रीच्या अंधारात असे प्रकार चालतात.
-----------------------------------
दंडाची रक्कम सव्वाशे कोटी
- या अभियानांतर्गत शहरे हागणदारीमुक्त करणे, घनकचरा व्यवस्थापनांतर्गत ‘स्वच्छ’ करणे अशा बाबींचा समावेश आहे. शहर कचरामुक्त होण्याकरता स्वच्छतेत क्रमाक्रमाने आणखी सुधारणा होण्यास्तव शहरांना तारांकित मानांकन देण्याबाबतची नियमावली केंद्र शासनाने तयार केली आहे.
- पालिका क्षेत्रात नियमांचे उल्लंघन होत आहे. कचरा व्यवस्थापन व सांडपाणी पुनप्रर्किया होत नसल्याने हरित लवादाने पालिकेला प्रतिदिन साडेदहा लाखांचा दंड ठोठावलेला आहे. आजमितीस या दंडाची रक्कम सव्वाशे कोटी इतकी झाली आहे.
==============================================
शहरात जमा झालेला मैला सांडपाणी पुनप्रर्किया केंद्रात सोडण्याऐवजी थेट शहरातील नाल्यांत सोडणे गंभीर बाब आहे. याबाबत तातडीने चौकशी करून दोषींवर कारवाई करण्यात येईल. याबाबत आरोग्य विभागाला चौकशी करण्यास सांगितले आहे.
- मनोजकुमार सूर्यवंशी, आयुक्त, वसई-विरार पालिका