मला गुन्हा मान्य नाही - राज ठाकरे

मला गुन्हा मान्य नाही
राज ठाकरे यांची ठाणे न्यायालयात हजेरी

सकाळ वृत्तसेवा
ठाणे, ता. ११ ः रेल्वे भरतीसाठी आलेल्या उत्तर भारतीय उमेदवारांना मनसेकडून मारहाण करण्यात आली होती. याबाबत राज ठाकरेंसह त्यांच्या सहकाऱ्यांवर गुन्हा दाखल करण्यात आला होता. त्या प्रकरणाची गुरुवारी (ता. ११) ठाणे न्यायालयात सुनावणी झाली. राज ठाकरे यांनी उपस्थित राहून हा गुन्हा मान्य नसल्याचे न्यायालयात सांगितले. आता हा खटला पुढे चालविला जाणार आहे, अशी माहिती ॲड. ओंकार राजूरकर यांनी पत्रकारांना दिली.
रेल्वे विभागाने २००८ मध्ये भरती प्रक्रिया राबवली होती. या भरतीसाठी आलेल्या उत्तर भारतीयांना मनसेकडून मारहाण केल्याच्या आरोपावरून मनसेप्रमुख राज ठाकरे यांच्यासह त्यांच्या सहकाऱ्यांवर गुन्हा दाखल झाला होता. या प्रकरणाच्या सुनावणीसाठी उपस्थित राहण्याचे आदेश न्यायालयाने राज आणि त्यांच्या सहकाऱ्यांना दिले होते. त्यानुसार, राज आणि त्यांच्या सहकाऱ्यांनी गुरुवारी न्यायालयात सुनावणीसाठी हजेरी लावली. राज ठाकरे यांची बाजू मांडण्यासाठी ॲड. सय्याजी नागरे, ॲड. ओंकार राजूरकर वकील उपस्थित होते. या वेळी रेल्वे भरतीसाठी आलेल्या उत्तर भारतीय उमेदवारांना मारहाण केल्याच्या आरोपावरून दाखल असलेला गुन्हा मान्य आहे का, असा प्रश्न न्यायाधीशांनी राज यांना विचारला. त्यावर गुन्हा मान्य नसल्याचे राज यांनी सांगितले. त्यामुळे चार्ज फ्रेम करण्यासाठी ही सुनावणी होती. राज यांनी गुन्हा मान्य नसल्याचे सांगितल्याने आता हा खटला पुढे चालविला जाणार आहे. १६ डिसेंबरला पुढील सुनावणी होणार आहे.