चित्रालेखा पाटील यांच्या विधानावर शिवसेनेचा निषेध

चित्रलेखा पाटील यांच्या विधानावर शिवसेनेचा निषेध
पोलादपूर, ता. ११ (बातमीदार) ः महाराष्ट्र राज्याचे रोजगार हमीमंत्री भरत गोगावले यांच्याबाबत शेतकरी कामगार पक्षाच्या नेत्या चित्रलेखा पाटील यांनी सोशल मीडियावर प्रसारित केलेल्या चुकीच्या व्हिडिओ प्रकरणावर पोलादपूर तालुका शिवसेना आणि युवासेनेने जाहीर निषेध नोंदवला. पोलादपूर येथील छत्रपती शिवाजी महाराज चौकामध्ये आयोजित कार्यक्रमात संतापलेल्या शिवसैनिकांनी पाटील यांच्या विधानाचा कडक शब्दांत निषेध करत त्यांच्या फोटोवर ‘जोडे मारो’ करत विरोध दाखवला.
निषेधाच्या वेळी सहसंपर्कप्रमुख व माजी जिल्हा परिषद सदस्य चंद्रकांत कळंबे, तालुकाप्रमुख नीलेश अहिरे, शहरप्रमुख सुरेश पवार, विभागप्रमुख लक्ष्मण मोरे, नगराध्यक्ष स्नेहा मेहता, तसेच युवासेना संपर्कप्रमुख विजय शेलार, विक्रम भिलारे, नगरसेवक विनायक दीक्षित, राजेश डांगे, दत्ता मोरे, सुनील तळेकर, अनिल दळवी, प्रसाद मोरे, रामदास कळंबे, प्रसाद पवार, गणेश येरूणकर, विभाग संघटिका गीता दळवी यांच्यासह शिवसैनिक, युवासैनिक व महिला आघाडी मोठ्या संख्येने उपस्थित होते.
शिवसेना पदाधिकाऱ्यांनी या व्हिडिओमुळे पसरलेल्या दिशाभूलविषयी तत्काळ कारवाई करण्याची मागणी केली. कार्यक्रमादरम्यान उपस्थितांनी पाटील यांच्या विधानामुळे समाजात गैरसमज निर्माण होऊ नये, यावर भर देत सार्वजनिक निषेध व्यक्त केला. तसेच प्रशासनाकडे कठोर पावले उचलण्याची विनंती केली.