''ध्वज दिन निधीसंकलन'' हे देशकार्य : जिल्हाधिकारी

‘ध्वजदिन निधी संकलन’ हे देशकार्य : जिल्हाधिकारी
अलिबाग, ता. ११ (वार्ताहर) : देशाच्या सीमेचे रक्षण करण्यासाठी सैनिक सतत सज्ज असतात. त्यांच्या कुटुंबांच्या मदतीसाठी ‘ध्वजदिन निधी संकलन’ हा उपक्रम अत्यंत महत्त्वाचा असून, हे कार्य जनतेपर्यंत मोठ्या प्रमाणात पोहोचणे आवश्यक आहे, असे प्रतिपादन जिल्हाधिकारी किशन जावळे यांनी केले. जिल्हाधिकारी कार्यालयातील राजस्व सभागृहात बुधवारी (ता. १०) हा उपक्रम उत्साहात सुरू करण्यात आला.
या वेळी अपर जिल्हाधिकारी सुनील थोरवे, अपर पोलिस अधीक्षक अभिजित शिवथरे, निवासी उपजिल्हाधिकारी संदेश शिर्के, जिल्हा अधीक्षक भूमी अभिलेख सुनील इंदलकर, जिल्हा सैनिक कल्याण अधिकारी कर्नल राहुल माने (निवृत्त) तसेच निवृत्त सैनिक आणि अधिकारी उपस्थित होते.
७ डिसेंबर हा दिवस १९४९ पासून सशस्त्र सेना ‘ध्वजदिन’ म्हणून साजरा केला जातो. देशाच्या जवानांना आदरांजली वाहणे आणि त्यांच्या कुटुंबांच्या गरजांना हातभार लावणे ही प्रत्येक नागरिकाची जबाबदारी आहे. युद्धात जखमी झालेले जवान, शहीद सैनिकांच्या कुटुंबीयांसाठी आणि निवृत्त सैनिकांच्या पुनर्वसनासाठी हा निधी वापरला जातो. सरकारी योजनांसोबतच नागरिकांनी स्वयंप्रेरणेने दिलेली मदत सैनिक कल्याणासाठी अत्यंत महत्त्वाची असल्याचेही त्यांनी नमूद केले. कार्यक्रमाची सुरुवात दीपप्रज्वलनाने झाली. त्यानंतर उपस्थित अधिकारी, कर्मचारी आणि नागरिकांकडून ध्वजदिन निधीसाठी योगदान देण्यात आले.