पनवेल पंचशील नगर झोपडपट्टीत हाय टेन्शन तार तुटून भीषण आग,

पनवेलमध्ये झोपडपट्टीत आग
पनवेल ता. ११ (बातमीदार) : नवीन पनवेल पूर्वेकडील पंचशील नगर झोपडपट्टी परिसरात गुरुवारी (ता. ११) दुपारी हाय टेन्शन वायर तुटून आग लागली. ही आग काही सेकंदात भडकली. आगीत अनेक झोपड्या खाक झाल्या. यात नागरिकांचे मोठे आर्थिक नुकसान झाले आहे.
आगीची माहिती मिळताच पनवेल शहर पोलिस, वाहतूक शाखा, महावितरण अधिकारी आणि अग्निशमन दल तातडीने घटनास्थळी दाखल झाले. अग्निशमन दलाच्या जवानांनी तत्काळ पाण्याचे फवारे मारत आग नियंत्रणात आणण्याची मोहीम सुरू केली. दरम्यान, बिकानेर स्वीट्सजवळील हाय टेन्शन टॉवरवरून वायर तुटली. ती झोपड्यांवर कोसळताच आग लागल्याचे प्रत्यक्षदर्शींनी सांगितले. ही घटना पनवेल रेल्वेस्थानकाच्या पूर्वेकडील पार्किंग आणि रिक्षा स्टँड परिसरात घडल्याने पार्किंगमधील अनेक दुचाकींचेही मोठ्या प्रमाणात नुकसान झाले. विशेष म्हणजे, विचुंबे गाढी नदीपूल, पोदी स्मशानभूमी, विसपुते कॉलेज, सेक्टर १५, पंचशील नगर, श्रीयश हॉस्पिटल ते नवीन पनवेल रेल्वे ब्रिज असा तीन किलोमीटर पट्टा हाय टेन्शन वायर लोंबकळत आहेत. या मार्गावर मोठ्या प्रमाणात वाहने ये-जा करत असल्याने नागरिकांमध्ये भीतीचे वातावरण पसरले होते. भविष्यात अशा दुर्घटना टाळण्यासाठी महावितरणने योग्य सुरक्षा पावले उचलावीत, अशी अपेक्षा व्यक्त होत आहे.