घर तुटण्याच्या मानसिक ताणाने मृत्यू

घर तुटण्याच्या मानसिक ताणाने मृत्यू
भाईंदर, ता. ११ (बातमीदार) : पैसे दिले नाहीत, तर घर तोडायला लावण्याच्या धमक्यांचा मानसिक ताण येऊन एका वृद्ध व्यक्तीचा मृत्यू झाल्याची घटना भाईंदर पश्चिम येथे घडली. पोलिसांनी याप्रकरणी चार जणांवर गुन्हा दाखल केला आहे.
भाईंदर पश्चिम लालबहादूर शास्त्री नगर येथे जोगिंदर प्रसाद प्रजापती (वय ६५) यांचे बैठे घर होते. त्यावर त्यांनी एक मजला वाढवला होता. या खोलीच्या दुरुस्तीचे काम सुरू असताना किरण ए के व त्याची पत्नी त्या ठिकाणी पाहोचले. आपण पत्रकार असून, ५० हजार रुपये दे, नाहीतर खोली तोडायला सांगू, अशी धमकी त्यांनी दिली, मात्र प्रजापती यांच्याकडे तेवढे पैसे नसल्याने त्यांनी पाच हजार रुपये दिले. काही दिवसांनी दोघे पुन्हा हजर झाले व प्रजापती यांच्याकडे पैशांची मागणी करू लागले, मात्र प्रजापती यांनी पैसे नसल्याचे संगितले. त्यामुळे किरण ए के याने मीठ विभागाकडे तक्रार करून वरचा मजला तोडायला लावला. दोन महिन्यांनी प्रजापती यांच्या घराच्या दुरुस्तीचे काम सुरू असताना किरण पुन्हा उगवला. या वेळी त्याने एक लाख रुपयांची मागणी केली. पैसे दिले नाहीत, तर पुन्हा घर तोडायला लावण्याची धमकी त्याने दिले. किरणप्रमाणे आणखी दोन जणांनी प्रजापती यांच्याकडे पैशांची मागणी केली होती. या धमक्यांचा प्रजापती यांच्यावर प्रचंड मानसिक ताण आला व त्यात त्यांचा बुधवारी (ता. १०) मृत्यू झाला. पोलिसांनी याप्रकरणी रात्री उशिरा ए के किरण, त्याची पत्नी यांच्यासह चार जणांवर खंडणीचा गुन्हा दाखल केला असून, पोलिस आरोपींचा शोध घेत आहेत.