सफाई कामगारांच्या घरांसाठी आज उपोषण

सफाई कामगारांच्या
घरांसाठी आज उपोषण
सकाळ वृत्तसेवा
मुंबई, ता. ११ : मुंबईतील सफाई कामगारांना मालकी हक्काची घरे देण्याच्या शासनाच्या आश्वासनाचे पडसाद नागपूर हिवाळी अधिवेशनात उमटण्याची चिन्हे आहेत. घरवाटपातील विलंबाविरोधात म्युनिसिपल मजदूर युनियन १२ डिसेंबरला नागपूर विधानसभेबाहेर एक दिवसाचे लाक्षणिक उपोषण करणार आहे. महापालिकेतील २९ हजार ६१८ सफाई कामगारांपैकी फक्त पाच हजार ५०० कामगारांना सेवा-निवासस्थाने देण्यात आली आहेत. त्यामुळे इतर कामगारांना बदलापूर, कल्याण, टिटवाळा, विरार, वसई, भाईंदर अशा दूरच्या ठिकाणांहून रोज प्रवास करून कामावर यावे लागत आहे. कामगारांच्या घरवाटपाबाबत मुख्यमंत्री, उपमुख्यमंत्री, गृहमंत्री आणि महापौरांना यापूर्वी अनेक निवेदने देण्यात आली; तथापि कोणतीही ठोस कार्यवाही झालेली नाही, असे युनियनचे अध्यक्ष अशोक जाधव यांनी सांगितले.

धोरणात्मक निर्णयाची मागणी
मुंबईतील सफाई कामगारांसाठी बांधण्यात येणारी १४ हजार घरे सफाई कामगारांना मालकी हक्काने द्यावीत, अशी युनियनची प्रमुख मागणी आहे. हिवाळी अधिवेशनात शासनाने यासंदर्भात धोरणात्मक निर्णय घेतला नाही, तर निवडणुकीच्या तोंडावर मोठा कामगार संघर्ष उभा राहील, असा इशारा युनियनने दिला आहे.