दरोडा न्यायालयीनकोठडी

हरीश दरोडाला न्यायालयीन कोठडी
दीड कोटींचे भातखरेदी गैरव्यवहार प्रकरण
शहापूर, ता. ११ (वार्ताहर) ः दीड कोटींच्या भातखरेदी गैरव्यवहारप्रकरणी अटक करण्यात हरीश ऊर्फ भाऊ दरोडा याला गुरुवारी (ता. ११) शहापूर न्यायालयात हजर करण्यात आले. त्याला न्यायालयीन कोठडी सुनावण्यात आल्याचे पोलिसांनी सांगितले. हरीश दरोडासह सहा जणांविरुद्ध साकडबाव भातखरेदी केंद्रात शेतकऱ्यांच्या खोट्या व बोगस चलन पावत्या बनवून शासनाची व आदिवासी विकास महामंडळाची सुमारे दीड कोटींची फसवणूक केल्याप्रकरणी किन्हवली पोलिस ठाण्यात दोन वर्षांपूर्वी गुन्हा दाखल करण्यात आला होता.
शहापूर तालुक्यातील साकडबाव केंद्रात तब्बल पाच हजार क्विंटल भाताची अफरातफर झाली होती. या प्रकरणाच्या चौकशीनंतर किन्हवली पोलिस ठाण्यात डिसेंबर २०२४ला आमदार दौलत दरोडा यांचा पुतण्या व साकडबाव आदिवासी विविध कार्यकारी सहकारी संस्थेचा अध्यक्ष हरीश ऊर्फ भाऊ दरोडा, संस्थेचे सचिव संजय पांढरे, केंद्रप्रमुख जयराम सोगीर, तसेच महामंडळाचे जव्हारचे तत्कालीन प्रादेशिक व्यवस्थापक विजय गांगुर्डे, शहापूरचे तत्कालीन उपप्रादेशिक व्यवस्थापक अविनाश राठोड व तत्कालीन विपणन निरीक्षक समाधान नागरे यांच्याविरुद्ध गुन्हा दाखल करण्यात आला होता. दोन वर्षांनंतर आर्थिक गुन्हे शाखेने हरीश दरोडा याला मंगळवारी अटक केली होती. त्याला शहापूर न्यायालयाने प्रथम दोन दिवसांची पोलिस कोठडी सुनावण्यात आल्यानंतर गुरुवारी शहापूर न्यायालयात पुन्हा हजर केले असता त्याला न्यायालयीन कोठडी सुनावली आहे. याबाबत आर्थिक गुन्हे शाखेच्या अधिकाऱ्यांशी संपर्क साधला असता त्यांनी प्रतिसाद दिला नाही. या प्रकरणातील भातखरेदी गैरव्यवहारामध्ये अफरातफर करणाऱ्या अन्य पाच जणांवर काय कारवाई होणार, याची माहिती मिळू शकली नाही.