उरणच्या जुन्या इमारतीला अचानक आग

उरणच्या जुन्या इमारतीला अचानक आग
अग्निशामक दलामुळे मोठा अनर्थ टळला
उरण, ता. ११ (वार्ताहर)ः उरण शहरातील गजबजलेल्या राजपाल नाका परिसरातील एका जुन्या इमारतीला गुरुवारी सायंकाळी अचानक आग लागली. घटनेची माहिती मिळताच सिडको आणि ओएनजीसीच्या अग्निशामक दलाने तत्काळ धाव घेऊन आगीवर पूर्णपणे नियंत्रण मिळवले. सुदैवाने या दुर्घटनेत कोणतीही जीवितहानी झाली नाही; मात्र इमारतीचे मोठे आर्थिक नुकसान झाले आहे. आगीचे कारण अद्याप स्पष्ट झालेले नाही.
घटनास्थळी पोलिसांनी तातडीने पोहोचून वाहतूक सुरळीत ठेवण्यासह जमलेल्या नागरिकांची गर्दी नियंत्रणात ठेवली. राजपाल नाका हा परिसर सदैव गजबजलेला असल्याने काही काळ नागरिकांमध्ये हलकी धाकधूक निर्माण झाली.
गेल्या काही महिन्यांपासून उरण तालुक्यात आगीच्या घटना वाढल्याचे चित्र समोर येत आहे. भंगार दुकान, गोदामे, चालती वाहने तसेच घरांना लागलेल्या आगींमुळे पूर्वी मोठी हानी झाली आहे. नुकतेच बौद्धवाडा येथे लागलेल्या आगीत तिघांचा दुर्दैवी मृत्यू झाला होता. डिसेंबर महिन्यातही एका घराला आग लागली होती.
वारंवार होणाऱ्या या दुर्घटनांमुळे नागरिकांत भीतीचं वातावरण असून, शहरातील जुन्या व जीर्ण इमारतींमध्ये अग्निसुरक्षा उपाययोजनांची सक्ती करण्याची मागणी आता जोर धरू लागली आहे. अग्निशामक दलाच्या तत्परतेमुळे आजचा संभाव्य मोठा अनर्थ मात्र टळला.