उत्तर भारतीय पदाधिकारी भाजपमध्ये

उल्हासनगर, ता. ११ (बातमीदार) : उल्हासनगरातील राजकारणात महापालिका निवडणुकीच्या पार्श्वभूमीवर मोठ्या घडामोडी सुरू आहेत. एकीकडे टीओकेचे ओमी कलानी हे शिवसेना आणि साईपक्षासोबत महापालिका निवडणूक लढवण्याचा निर्णय घेत असतानाच, टीओकेतील प्रमुख पदाधिकारी मात्र एकामागून एक पक्षाला सोडचिट्टी देत भाजपमध्ये प्रवेश करत आहेत.
या पार्श्वभूमीवर टीओकेत अत्यंत सक्रिय असलेले सचिव ब्रिजबिहारी शुक्ला यांनी भाजपमध्ये प्रवेश केला. मुंबई प्रदेशाध्यक्ष रवींद्र चव्हाण यांच्या हस्ते त्यांचा पक्षप्रवेश झाला. यावेळी जिल्हाध्यक्ष राजेश वधारिया, निवडणूक प्रमुख प्रदीप रामचंदानी, उत्तर भारतीय सेलचे अध्यक्ष राकेश पाठक आदी मान्यवर उपस्थित होते. पॅनल क्रमांक १ धोबीघाट परिसरात ब्रिजबिहारी शुक्ला यांचा भक्कम संपर्क असून, भाजप उत्तर भारतीय सेलचे अध्यक्ष राकेश पाठक यांच्या पुढाकारातून त्यांचा पक्षप्रवेश घडवून आणण्यात आला. त्यामुळे या पॅनलमध्ये भाजपचे वर्चस्व अधिक मजबूत होत असल्याचे राजकीय वर्तुळात बोलले जात आहे. यापूर्वीही टीओकेमधील संजय सिंह, प्रभुनाथ गुप्ता, ब्रिजेश श्रीवास्तव, उर्मिला गुप्ता यांसारख्या पदाधिकाऱ्यांनी टीओकेला सोडचिट्ठी देत भाजपमध्ये जाण्याचा निर्णय घेतला होता.