वैद्यकीय अहवालांनंतरच वडिलांच्या याचिकेवर निर्णय : उच्च न्यायालय

दिशा सालियन मृत्यू प्रकरण 
वैद्यकीय अहवालानंतरच वडिलांच्या याचिकेवर निर्णय  : उच्च न्यायालय
सकाळ वृत्तसेवा

मुंबई, ता. ११ : अभिनेता सुशांतसिंह राजपूतची माजी व्यवस्थापक दिशा सालियनच्या मृत्युसंदर्भातील पुरावे नव्याने न्यायवैद्यक तपासणीसाठी पाठवण्यात आले असून, त्याचा अहवाल अद्याप आलेला नाही. त्यामुळे या याचिकेशी संबंधित आवश्यक सर्व वैद्यकीय अहवाल पाहूनच निर्णय घेण्यात येईल, असे गुरुवारी (ता. ११) उच्च न्यायालयाने स्पष्ट केले. 

दिशावर सामूहिक बलात्कार करून तिची हत्या केल्याचा आरोप करणारी याचिका वडील सतीश सालियन यांनी उच्च न्यायालयात केली आहे. तसेच, दिशाच्या मृत्यूप्रकरणी गुन्हा दाखल करून त्याची सीबीआय चौकशीची मागणी केली आहे. राज्यातील काही प्रभावशाली व्यक्तींना वाचवण्यासाठी हे प्रकरण दडपण्याचा आरोपही सालियन यांनी याचिकेत आहे.  या याचिकेवर न्या. अजय गडकरी आणि न्या. रणजितसिंह भोसले यांच्या खंडपीठापुढे सुनावणी झाली. त्या वेळी प्रकरणाशी संबंधित पुरावे नव्याने तपासणीसाठी न्यायवैद्यक प्रयोगशाळेत पाठवण्यात आल्याची आणि त्याचा अहवाल अद्याप आला नसल्याची माहिती सरकारी वकील मनकुँवर देशमुखांनी न्यायालयाला दिली. तसेच, याचिकेवर सुनावणी तहकूब करण्याची मागणी केली. त्याची दखल घेऊन याप्रकरणी प्राथमिक मत तयार करण्यासाठीही आम्हाला वैद्यकीय अहवाल पाहणे आवश्यक असल्याचे न्यायालयाने नमूद केले आणि एका आठवड्यात दिशाचा शवविच्छेदन अहवाल सादर करण्याचे आदेश दिले.