रोटरी क्लब ऑफ वाडातर्फे ‘उड्डाण’ प्रेरणादायी कार्यक्रमाचे ओंदे महाविदलयात आयोजन

ओंदे महाविद्यालयात ‘उड्डाण’कार्यक्रम उत्साहात
विक्रमगड, ता. १४ (बातमीदार) : रोटरी क्लब ऑफ वाडा यांच्या वतीने ‘लेट्स इन्स्पायर - युनाइट फॉर गुड’ या संकल्पनेअंतर्गत ओंदे येथील कला, वाणिज्य व विज्ञान महाविद्यालयात विद्यार्थ्यांसाठी ‘उड्डाण’ या विशेष प्रेरणादायी कार्यक्रमाचे आयोजन करण्यात आले होते.
विद्यार्थ्यांना नवी क्षितिजे दाखवणे, नेतृत्वगुण विकसित करणे आणि भविष्यातील आव्हानांसाठी त्यांना सज्ज करणे, हा त्यामागील उद्देश होता. कार्यक्रमाचे प्रमुख वक्ते अक्षत सिंग यांनी विद्यार्थ्यांशी संवाद साधताना मोठी स्वप्ने बाळगणे, चिकाटी ठेवणे आणि उपलब्ध संधींचा उपयोग करणे यावर भर देत अत्यंत प्रेरणादायी मार्गदर्शन केले. कार्यक्रमाच्या अध्यक्षस्थानी महाविद्यालयाचे प्र. प्राचार्य डॉ. विनोद सोनवणे होते. तसेच, सं. ग्रा. वै. सा. स. प्रतिष्ठानचे अध्यक्ष मिलिंद पाटील, रोटरी क्लब ऑफ वाडाचे अध्यक्ष रोटरियन ऋषिकेश पाटील आणि इतर सदस्य उपस्थित होते. या उपक्रममालेमुळे विद्यार्थ्यांमध्ये आत्मविश्वास वाढण्यास मदत मिळेल, असे आयोजकांनी सांगितले.