लोअर परेल पुलाखाली राडारोडा

लोअर परेल पुलाखाली राडारोडा
परिसर सुशोभीकरणाची मागणी
प्रभादेवी, ता. १४ : लोअर परेल येथील पुलाखालीलल परिसरात मोठ्या प्रमाणावर राडारोडा व कचरा साचल्याने परिसराची अवस्था अत्यंत विद्रूप झाली आहे. सतत ये-जा करणाऱ्या नागरिकांना याचा त्रास सहन करावा लागत असूनल आरोग्याच्या दृष्टीनेही ही बाब धोकादायक ठरत आहे.
लोअर परेल येथील नवीन बांधण्यात आलेल्या पुलाचे उद्‌घाटन २०२३ मध्ये करण्यात आले. तेव्हापासून आतापर्यंत या पुलाखालील परिसर बकाल झाला असूनल त्याचे सुशोभीकरण करण्यात यावे, अशी मागणी युवा सेनेच्या वतीने करण्यात आली आहे.
लोअर परेल पुलाखालील परिसरात परिसरातील मुलांना खेळण्यासाठी उद्यान तसेच ज्येष्ठ नागरिकांना बसण्यासाठी बाक व फिरण्यासाठी ट्रॅक बनविण्यात यावा अशा मागणीचे पत्र पालिकेच्या जी दक्षिण विभागाला देण्यात आल्याचे युवासेनेचे वरळी युवा विभाग अधिकारी संकेत सावंत यांनी सांगितले.
पुलाखाली टाकण्यात आलेल्या बांधकाम साहित्याच्या उरलेल्या ढिगाऱ्यांमुळे दुर्गंधी पसरली आहे. तसेच पावसाळ्यात येथे पाणी साचण्याची शक्यता वाढते. त्‍यामुळे डासांचा प्रादुर्भाव होऊन आजार पसरण्याची भीती व्यक्त केली जात आहे.
हा पूल टी आकारासारखा मोठा आहे. त्यामुळे या ठिकाणी अतिक्रमण तसेच रात्रीच्या वेळी अंधारामुळे मद्यपी व जुगारी व गर्दुल्ले यांचा वावरदेखील वाढू शकतो. त्यामुळे या ठिकाणी लवकरात लवकर सुशोभीकरण करण्यात यावे, अशी मागणी होत आहे.