आसनगाव विद्यार्थ्यांची बोईसर पोलीस ठाण्यास शैक्षणिक भेट

विधी विद्यार्थ्यांची पोलिस ठाण्यास शैक्षणिक भेट
वाणगाव, ता. १४ (बातमीदार) : तात्यासाहेब कोरे विधी महाविद्यालय, आसनगाव येथील विद्यार्थ्यांनी विधी शिक्षणाला थेट अनुभवाचा स्पर्श देण्यासाठी बोईसर पोलिस ठाण्यास शैक्षणिक भेट दिली. विधी विद्यार्थ्यांमध्ये भविष्यातील उत्कृष्ट विधीज्ञ घडवण्याच्या दृष्टीने हा उपक्रम आयोजित करण्यात आला होता.
विद्यार्थ्यांना पोलिस ठाण्याचे दैनंदिन कामकाज, गुन्हा नोंद प्रक्रिया, तपास प्रक्रिया आणि कायदेशीर बाबींची प्रत्यक्ष माहिती देणे, या उद्देशाने शैक्षणिक भेटीचे आयोजन करण्यात आले होते. प्राचार्य डॉ. विश्वास पांचाळ आणि प्राध्यापक ॲड. विद्युत मोरे यांच्या मार्गदर्शनाखाली हा उपक्रम पार पडला. बोईसर पोलिस ठाण्याच्या वतीने प्रभारी अधिकारी पोलीस निरीक्षक सुनील जाधव, उपनिरीक्षक नितीन नरळे तसेच हवालदार (गोपनीय) विशाल पाटील यांनी विद्यार्थ्यांना सोप्या भाषेत माहिती दिली.
या भेटीमुळे विद्यार्थ्यांना कायद्याची अंमलबजावणी प्रत्यक्ष अनुभवातून समजण्यास मदत झाली, जी त्यांच्या शैक्षणिक दृष्टीने अत्यंत उपयुक्त ठरली. अशा प्रत्यक्ष अनुभव आधारित उपक्रमांचे महत्त्व भविष्यात विधीज्ञ घडवण्यासाठी अनमोल आहे, असा विश्वास डॉ. विश्वास पांचाळ यांनी व्यक्त केला.