पीएम श्री शासकीय कन्या आश्रमशाळा, वरवाडा येथे वार्षिक स्नेहसंमेलन उत्साहात

वरवाडा येथे वार्षिक स्नेहसंमेलन उत्साहात
तलासरी, ता. १४ (बातमीदार) : पीएम श्री शासकीय माध्यमिक व उच्च माध्यमिक कन्या आश्रमशाळा, वरवाडा येथे शनिवारी (ता. १३) शाळेच्या ४६ व्या वर्धापनदिनानिमित्त वार्षिक स्नेहसंमेलन, बालिका आनंद मेळावा आणि पालक संवाद कार्यक्रम उत्साहात पार पडला.
विद्यार्थिनींनी नाचणी आंबील, सुकी भेळ, आळूवड्या यांसारखे पारंपरिक खाद्यपदार्थ आणि फन गेम्सचे १८ वर्गणी स्टॉल उभारले होते, जे उपस्थितांचे आकर्षण ठरले. वर्धापनदिनानिमित्त केक कापण्यात आला आणि त्यानंतर विद्यार्थिनींनी ३४ सांघिक व वैयक्तिक नृत्य सादरीकरणे केली. प्रकल्पस्तरीय क्रीडा स्पर्धांमधील यशस्वी खेळाडूंचा सांघिक प्रकारात सात प्रथम व तीन द्वितीय क्रमांक, तर वैयक्तिक प्रकारात तीन सुवर्ण व दोन रौप्यपदक विजेत्या विद्यार्थिनींचा गौरव करण्यात आला. तसेच दहावी आणि बारावीतील गुणवंत विद्यार्थिनींना सन्मानचिन्हे देण्यात आली. प्रभारी मुख्याध्यापक सुरेश इभाड यांना ‘उपक्रमशील मुख्याध्यापक’ आणि पाच शिक्षकांना ‘उपक्रमशील शिक्षक’ म्हणून प्रकल्प अधिकारी विशाल खत्री (भा.प्र.से.) यांच्या हस्ते सन्मानित करण्यात आले.