मुरबाड तालुक्यात बिबट्याचा वावर; ग्रामस्थामध्ये भीतीचे वातावरण

मुरबाड तालुक्यात बिबट्याचा वावर
टोकावडे, ता. १४ (बातमीदार) ः तालुक्यातील भुवनपाडा परिसरात बिबट्याचा वावर असल्याचे वृत्त समोर आले आहे. दोन दिवसांपूर्वी काही ग्रामस्थांना बिबट्या दिसल्याचे सांगण्यात येत आहे. त्यामुळे परिसरात भीतीचे वातावरण पसरले आहे. तर शनिवारी (ता. १३) रात्री खोपिवली गावाच्या परिसरामध्ये एका कुत्र्याला बिबट्याने ठार केल्याची घटना घडली आहे.
मुरबाड तालुक्यात अधूनमधून बिबट्याचे दर्शन होत असून यापूर्वीही कुत्रे फस्त झाल्याच्या घटना घडल्या आहेत. खोपिवली परिसरात अशाच प्रकारचा वावर असल्याचे ग्रामपंचायत सदस्य मुकुंद कराळे यांनी सांगितले. या घटनेची माहिती तातडीने मुरबाड वनविभागाला देण्यात आली आहे. वनविभागाच्या कर्मचाऱ्यांनी भुवन येथे घटनास्थळी भेट देत ग्रामस्थांना धीर दिला. खबरदारीच्या सूचना केल्या आहेत. रात्री शक्यतो घराबाहेर जाणे टाळावे. लहान मुलांना अंगणात एकटे सोडू नये. महिलांनी शेतावर एकट्याने जाणे टाळावे. तसेच संध्याकाळी फटाके फोडून परिसरात आवाज निर्माण करावा, अशा सूचना देण्यात आल्या आहेत. बिबट्या आढळल्यास त्वरित वनविभागाशी संपर्क साधण्याचे आवाहन करण्यात आले आहे. वनविभागाकडून परिस्थितीवर लक्ष ठेवण्यात येत असून नागरिकांनी संयम बाळगून सूचनांचे पालन करावे, असेही सांगण्यात आले आहे.