राष्ट्रीय कला उत्सवासाठी संदेश विद्यालयाची निवड

विक्रोळीतील संदेश विद्यालयाचे यश
राष्ट्रीय कला उत्सवासाठी निवड

घाटकोपर, ता. १४ (बातमीदार) : शालेय शिक्षण व साक्षरता विभाग, शिक्षण मंत्रालय, भारत सरकार आणि महाराष्ट्र शासनाच्या शालेय शिक्षण व क्रीडा विभागांतर्गत राज्य शैक्षणिक संशोधन व प्रशिक्षण परिषद, महाराष्ट्र यांच्या वतीने पुणे येथे राज्यस्तरीय कला उत्सवाचा निकाल नुकताच जाहीर झाला. या कला उत्सवात ज्ञान प्रसारक शिक्षण संस्थेच्या शिक्षकमित्र प्राचार्य बाळासाहेब म्हात्रे शैक्षणिक संकुल, पार्क साईट, विक्रोळी (पश्चिम) येथील संदेश विद्यालय अँड ज्युनियर महाविद्यालयाने सर्वाधिक तीन पारितोषिके पटकावली.
समूह गायन स्पर्धेत संदेश विद्यालयाच्या वैष्णव तोरणे, गौरव गवांदे, अश्रुती जाधव, सिद्धी गोरिवले यांनी प्रथम क्रमांक; एकल वाद्यवादन स्पर्धेत कार्तिक कदमने प्रथम क्रमांक आणि समूह वाद्यवादन स्पर्धेत आदर्श घोंगे, आदिनाथ उतेकर, आशीष म्हस्के, हिमांशू भोपळे यांनी तृतीय क्रमांक पटकावला.

सलग ११ व्या वर्षी यशप्राप्ती

संदेश विद्यालयाने राज्यस्तरीय कला उत्सवात सलग ११ व्या वर्षी पारितोषिक पटकावले असून, सहाव्या वर्षी शाळेची राष्ट्रीय कला उत्सवासाठी निवड झाली आहे. यावर्षी राष्ट्रीय कला उत्सवाच्या आयोजनाचा बहुमान महाराष्ट्र राज्याला मिळाला असून, शाळेच्या प्रथम क्रमांक प्राप्त विद्यार्थ्यांची २० ते २५ डिसेंबर २०२५ या कालावधीत यशदा, पुणे येथे होणाऱ्या राष्ट्रीय कला उत्सवासाठी निवड झाली आहे.