नोटीस न देताच पालिकेने स्टॉल हटवला

नोटीस न देताच पालिकेने स्टॉल हटवला

मुंबई, ता. १४ ः दादर पूर्व येथील शिंदेवाडी रेशनिंग ऑफिसच्या बाजूला असलेला बळीराम रोहिदास राजगुरू यांचा बी. आर. फर्निचर वर्क्स नावाचा स्टॉल पालिका प्रशासनाने कुठल्याही प्रकारची नोटीस न देता हटविला आहे. यामुळे स्थानिक नागरिकांमध्ये संतापाची लाट पसरली आहे.
बळीराम रोहिदास राजगुरू (६१) हे ज्येष्ठ नागरिक असून त्यांचा बी. आर. फर्निचर वर्क्स नावाचा अधिकृत स्टॉल गेल्या अनेक वर्षांपासून या ठिकाणी आहे. त्यांच्याकडे शॉप व दुकाने व आस्थापना नोंदणी प्रमाणपत्र उद्योग आधार सूक्ष्म, लघू व मध्यम केंद्र सरकारचे प्रमाणपत्र आहे. प्रोफेशन टॅक्स अशी सर्व प्रकारची प्रमाणपत्रे आहेत. मागील ४० वर्षे ते या ठिकाणी व्यवसाय करीत होते; परंतु पालिकेच्या एफ साऊथ विभागाने त्यांना कुठल्याही प्रकारची नोटीस न देता या स्टॉलवर कारवाई केली. यासंदर्भात स्थानिक सामाजिक कार्यकर्त्या संगीता माने यांच्याशी संपर्क साधला असता त्यांनी यासंदर्भात सहकार्य करून महापालिकेकडे पाठपुरावा करते, असे आश्वासन दिले.