खारेगाव भुयारी मार्ग एप्रिलपर्यंत बंद

खारेगाव भुयारी मार्ग एप्रिलपर्यंत बंद
- माजिवडा ते वडपे रस्ता रुंदीकरणाला वेग
- मुंबई-नाशिक महामार्गावरील ताण वाढणार
सकाळ वृत्तसेवा
ठाणे, ता. १४ ः मुंबई-नाशिक महामार्गावर माजिवडा ते वडपे रस्ता रुंदीकरणाचे काम महाराष्ट्र राज्य रस्ते विकास महामंडळाने हाती घेतले आहे. या कामासाठी उद्या (ता. १५) ते ९ एप्रिलपर्यंत खारेगाव भुयारी मार्ग वाहतुकीसाठी पूर्णपणे बंद असणार आहे. या कामामुळे वाहतूक वळवण्यात आली असून, महामार्गावर ताण वाढण्याची शक्यता आहे.
मुंबई-नाशिक महामार्गावरील ठाणे ते भिवंडी बायपास मार्गाचे काम वेगाने सुरू आहे. मार्चपर्यंत हे काम पूर्ण करण्याचा प्रयत्न असणार आहे. सध्या या महामार्गावरून मुंबई, ठाणे, भिवंडी, कळवा, कल्याण, नवी मुंबईच्या दिशेने लाखो वाहने वाहतूक करत आहेत. वाहतूक करणारी हजारो वाहने मुंबई नाशिक महामार्गाचा वापर करतात, मात्र माजिवडा ते वडपेपर्यंतच्या रस्ता अरुंद असल्याने येथे सतत वाहतूक कोंडी होत आहे. ही कोंडी फोडण्यासाठी एमएसआरडीएने रुंदीकरणाचे काम हाती घेतले आहे. त्यासाठी वाहतूक पोलिसांनी वाहतूक बदल लागू केले आहेत.
प्रवेशबंदी
वाहतूक विभागाने जारी केलेल्या आधिसूचनेनुसार आता मुंबई-नाशिक महामार्गावरील खारेगाव भुयारी मार्गाने खारेगावच्या दिशेने वाहतूक करणाऱ्या वाहनांना खारेगाव भुयारी मार्गावर प्रवेशबंदी करण्यात आली आहे. या मार्गे जाणारी वाहने टोलनाका, गॅमन रोड, पारसिक चौक मार्गे वाहतूक करतील. किंवा साकेत येथून खाडी पूल मार्गे पुढे जातील, तर खारेगाव भुयारी मार्गे मुंबई नाशिक मार्गावरून भिवंडी किंवा ठाण्याच्या दिशेने वाहतूक करणाऱ्या वाहनांना खारेगाव भुयारी मार्गात प्रवेशबंदी असेल. येथील वाहने खारेगाव, पारसिक चौक, गॅमन रोड मार्गे, तर ठाण्याच्या दिशेने वाहतूक करणारी वाहने कळवा खाडी पूल मार्गे पुढे जातील. हा वाहतूक बदल १५ डिसेंबर ते ९ एप्रिलपर्यंत लागू असणार आहे.