बँक ऑफ इंडिया मालवणी शाखेच्या एटीएमबाहेर सुरक्षा रक्षकाचा अभाव

एटीएममध्ये महिलेचे पैसे अडकले
मालवणीतील बँक ऑफ इंडियाच्या केंद्राबाहेर सुरक्षा रक्षकाचा अभाव

मालाड, ता. १५ (बातमीदार) : मालाड पश्चिमेतील बँक ऑफ इंडियाच्या मालवणी शाखेच्या एटीएम केंद्राबाहेर सुरक्षा रक्षक नसल्यामुळे नागरिकांना अडचणींना सामोरे जावे लागत आहे. याचाच फटका एका महिलेला बसला असून, तिचे पैसे एटीएम मशीनमध्ये अडकले.
शनिवारी (ता. १३) सकाळी ८ वाजण्याच्या सुमारास लक्ष्मी गुप्ता यांनी त्यांच्या बचत खात्यात एटीएमद्वारे तीन हजार रुपये जमा केले, मात्र पैसे मशीनमध्ये गेल्यानंतर अचानक एटीएम बंद पडले आणि त्यांचे पैसे अडकून राहिले. या घटनेनंतर लक्ष्मी गुप्ता यांनी बँकेच्या सुरक्षा रक्षकाला शोधण्याचा प्रयत्न केला, परंतु एटीएमबाहेर कोणीही उपस्थित नसल्याने त्या हताश होऊन एटीएममध्येच काही वेळ बसून राहिल्या. या वेळी सामाजिक कार्यकर्त्या सोमा डे यांनी त्यांना धीर दिला. त्यानंतर सोमा डे यांनी लक्ष्मी गुप्ता यांना सोबत घेऊन मालवणी पोलिस ठाण्यात धाव घेतली. तेथे पोलिसांनी सोमवारी बँकेत जाऊन तक्रार केल्यास पैसे परत मिळतील व आवश्यक सहकार्य केले जाईल, असे आश्वासन दिल्याची माहिती लक्ष्मी गुप्ता यांनी दिली.
देशभरातील कोणत्याही एटीएमबाहेर सुरक्षा रक्षक नसतात, मात्र शाखेबाहेर असतात. मग या शाखेबाहेर शनिवारी (ता. १३) सुरक्षा रक्षक का नव्हता, असे विचारल्यावर बँक ऑफ इंडियाचे मालवणी शाखा व्यवस्थापक आशीष शर्मा यांनी उत्तर देणे टाळले. तसेच बाहेर असलेल्या सुरक्षा रक्षकाला विचारले असता तो म्हणाला की, शनिवारी माझी सुट्टी होती.
दरम्यान, सोमवारी (ता. १५) बँकेच्या शाखेत जाऊन लक्ष्मी गुप्ता यांनी याबाबत माहिती दिल्यावर काही तासात तुमचे पैसे तुमच्या खात्यात जमा होतील, असे आश्वासन बँक प्रशासनाकडून देण्यात आले.