पार्कसाईट येथे पाण्याच्या टाकीचे भूमिपूजन

पार्कसाईट येथे पाण्याच्या टाकीचे भूमिपूजन
पालकमंत्री आशीष शेलार यांची उपस्‍थिती
घाटकोपर, ता. १५ (बातमीदार) ः विक्रोळी पार्कसाईट परिसरातील आनंदगड येथील पाण्याच्या टाकीची क्षमता वाढविण्यासाठी पालकमंत्री आशीष शेलार यांच्या हस्ते भूमिपूजन सोहळा पार पडला. हा कार्यक्रम रविवारी (ता. १४) सायंकाळी विक्रोळी पार्कसाईट येथील तीन पाण्याच्या टाक्यांच्या परिसरात आयोजित केला होता.
याप्रसंगी स्थानिक आमदार राम कदम, एन वॉर्ड सहाय्यक आयुक्त गजानन बेल्लाळे, माजी नगरसेविका ज्योती हारून खान, हारून खान, अनिल निर्मले यांच्यासह पालिकेच्या पाणी खात्याचे अधिकारी व स्थानिक लोकप्रतिनिधी उपस्थित होते.
नागरिकांना पुरेसे व नियमित पाणी मिळवून देणे हाच आमचा प्रमुख उद्देश आहे, असे पालकमंत्री आशीष शेलार यांनी सांगितले. येणाऱ्या निवडणुका या युतीतूनच लढवण्यात येतील, असेही त्यांनी या वेळी सांगितले. शेलार यांनी या वेळी शिवसेना ठाकरे गटावर टीका केली.
स्थानिक आमदार राम कदम यांनी आपली भूमिका मांडताना सांगितले, की नागरिकांना पिण्याचे शुद्ध पाणी मिळत नाही. अनेक ठिकाणी रात्रीच्या वेळी पाणीपुरवठा केला जात असल्यामुळे नागरिकांना मोठ्या अडचणींचा सामना करावा लागत आहे. आगामी काळात नवीन पाण्याच्या टाक्या उभारण्यात येणार असून, जुन्या टाक्यांची क्षमता वाढविण्यात येणार आहे. यासाठी पाणी खात्याच्या जागेचे अधिग्रहण पूर्ण करण्यात आले असून, लवकरच प्रत्यक्ष बांधकामास सुरुवात होणार असल्याची माहिती या वेळी देण्यात आली.