तीन दिवसीय भव्य बाल कला क्रीडा मेळावा

पालघर-ठाणे जिल्ह्यात भव्य बाल कला क्रीडा मेळावा उत्साहात
विरार, ता. १५ (बातमीदार) : ग्रामीण आणि शहरी भागातील मुला-मुलींच्या सर्वांगीण विकासाला चालना देण्यासाठी श्रमजीवी संघटना व विधायक संसद यांच्या संयुक्त विद्यमाने पालघर व ठाणे जिल्ह्यांत शनिवार (ता. १३) ते सोमवार (ता. १५) तालुका स्तरीय भव्य बाल कला क्रीडा मेळावा उत्साहात पार पडला.
ठाणे जिल्ह्यातील भिवंडी (ग्रामीण/शहर), शहापूर, मिरा-भाईंदर, ठाणे, मुरबाड आणि पालघर जिल्ह्यातील वसई (ग्रामीण/शहर), तलासरी, जव्हार, मोखाडा, वाडा, विक्रमगड या तालुक्यांत हा मेळावा पार पडला. बाल कला क्रीडा मेळाव्यात मुला-मुलींसाठी कबड्डी, लंगडी, खो-खो यांसारखे सांघिक खेळ तसेच चमचा-गोटी, धावणे, वक्तृत्व स्पर्धा, रांगोळी स्पर्धा, चित्रकला स्पर्धा, गोळा फेक, सांस्कृतिक कार्यक्रम यांसारखे वैयक्तिक व कला प्रकारांचे आयोजन करण्यात आले होते. प्रत्येक ठिकाणी शेकडो मुला-मुलींनी उत्स्फूर्त सहभाग नोंदवला. विजेत्यांना मान्यवरांच्या हस्ते प्रशस्तिपत्रक, पदक आणि शालोपयोगी साहित्य देऊन गौरविण्यात आले.
श्रमजीवी संघटना व विधायक संसद अंतर्गत संघटनेचे अध्यक्ष रामभाऊ वारणा यांच्या मार्गदर्शनाखाली विजय जाधव, सुरेश रेंजड, सीता घाटाळ, गणेश उंबरसडा आणि किशोर मढवी आदी पदाधिकाऱ्यांनी आयोजनाची धुरा सांभाळली. स्थानिक शिक्षक, कार्यकर्ते आणि हितचिंतकांच्या अथक प्रयत्नातून हा मेळावा पालघर-ठाणे जिल्ह्यात आदर्श ठरला.
------------------
अग्निवीर योजनेत सहभागी व्हा!
आदिवासी विकास आढावा समितीचे अध्यक्ष (राज्यमंत्री) विवेक पंडित यांनी मेळाव्याला विशेष भेट दिली व सहभागी तरुण-तरुणींना मार्गदर्शन केले. तरुणांना देशसेवेसाठी प्रोत्साहन देताना ते म्हणाले, की आदिवासी भागातील तरुण-तरुणींनी मोठ्या संख्येने ‘अग्निवीर’ योजनेत सहभागी होऊन देशसेवा करावी. भारतीय सैन्य, नौदल व हवाई दलात १७ ते २१ वयोगटातील विद्यार्थ्यांना अग्निवीर म्हणून संधी असून, प्रशिक्षणादरम्यान सुमारे ४० हजार रुपये मानधन मिळते, असेही त्यांनी सांगितले. तसेच १५ वर्षांपासूनच मुलांना शिस्त व प्रशिक्षणातून घडवण्याचे आवाहन केले.