लाडकी बहीण योजना महिलांसाठी आधारवड

उल्हासनगर, ता. १५ (बातमीदार) : लाडकी बहीण योजना महिलांसाठी आधारवड ठरत असल्याचे चित्र उल्हासनगर शहरात दिसून येत आहे. या योजनेतून मिळालेल्या आर्थिक मदतीतून एका महिलेने साडीला फॉल लावण्याचा छोटेखानी व्यवसाय सुरू केला आहे. ही माहिती ऐकून शेकडो महिलांना यातून प्रेरणा मिळत आहे.
मागील महिन्यात काँग्रेसमधून भाजपत प्रवेश केलेले गौरव गौतम भालेराव यांच्या पुढाकाराने उल्हासनगरातील १४ नंबर शाळेजवळ लाडक्या बहिणींसाठी हळदीकुंकू कार्यक्रम झाला होता. या कार्यक्रमाला भाजप जिल्हाध्यक्ष राजेश वधारिया, निवडणूक प्रमुख प्रदीप रामचंदानी, ब्लॉक अध्यक्ष जय शर्मा, शेरी लुंड, अमर लुंड, दिनेश पंजाबी उपस्थित होते. कार्यक्रमादरम्यान लाडक्या बहिणींशी संवाद साधताना वधारिया यांनी एका प्रेरणादायी महिलेची कथा सांगितली. उल्हासनगरात राहणारी ही महिला साड्यांना फॉल लावण्याचे काम करते. पूर्वी तिला ग्राहकांकडून आलेल्या साड्यांसाठी मॅचिंग फॉल शोधण्यासाठी विविध दुकानांत फिरावे लागत होते. यामध्ये तिचा बराच वेळ आणि श्रम खर्ची पडत होते. अशा परिस्थितीत लाडकी बहीण योजनेअंतर्गत तिच्या खात्यात साडेचार हजार रुपये जमा झाले. या रकमेचा उपयोग करून तिने थेट होलसेल दरात फॉल खरेदी केले. त्यामुळे आता तिला बाजारात वारंवार जाण्याची गरज उरलेली नाही. तिचे दररोजचे किमान दोन तास वाचू लागले असून, काम अधिक सुलभ झाले आहे. या छोट्या व्यवसायातून कुटुंबाला थोडाफार का असेना; पण आर्थिक आधार मिळत असल्याचे वधारिया यांनी सांगितले. ही माहिती ऐकताच उपस्थित महिलांनी टाळ्यांच्या गजरात दाद दिली.