सिमेंटच्या जंगलात कोंडलेला श्वास

बिल्डर-प्रशासन युतीमुळे प्रदूषण नियंत्रण कागदोपत्रीच
श्याम उबाळे यांची टीका
टिटवाळा, ता. १६ (वार्ताहर) : टिटवाळा शहर आणि निंबवली, राया, मांडा, गोवेली यांसारख्या कल्याण ग्रामीण भागांत मागील काही वर्षांमध्ये मोठ्या प्रमाणात बांधकामे, महामार्ग व अंतर्गत रस्त्यांची खोदकामे सुरू आहेत. यातून निर्माण होणाऱ्या धुळीमुळे नागरिकांचे आरोग्य धोक्यात आले आहे. या पार्श्वभूमीवर सामाजिक कार्यकर्ते श्याम उबाळे यांच्यासह कल्याण-कसारा-कर्जत रेल्वे प्रवासी संघटनेच्या वतीने ठाणे जिल्हाधिकारी कार्यालयाकडे अनेकदा लेखी निवेदने दिली आहेत. मात्र बिल्डर, लोकप्रतिनिधी आणि प्रशासन यांच्यातील अभद्र युतीमुळे हा प्रश्न केवळ कागदोपत्रीच मर्यादित राहिला असल्याचे मत श्याम उबाळे यांनी व्यक्त केले आहे.
शहरातील आणि ग्रामीण भागातील रस्त्यांवर सर्वत्र सुरू असलेली खोदकामे, बांधकाम साहित्याची उघडी वाहतूक आणि नियमांचे सर्रास उल्लंघन यामुळे हवेतील प्रदूषण वाढले आहे. कल्याण, उल्हासनगर आणि टिटवाळा येथील रुग्णालयांत श्वसनाचे विकार, क्षयरोग, न्यूमोनिया आणि फुप्फुस व हृदयविकाराच्या रुग्णांची संख्या लक्षणीयरीत्या वाढत असल्याचे दिसून येत आहे. आधीच मर्यादित असलेल्या आरोग्य सुविधांवर रुग्णांचा ताण वाढत असून, मृत्यूदरातही वाढ होत असल्याची गंभीर बाब उबाळे यांनी अधोरेखित केली आहे.
स्थानिक स्वराज्य संस्था आणि जिल्हा प्रशासनाकडून बांधकाम परवानग्या दिल्या जात असल्या तरी, त्या परवानग्यांमधील पर्यावरणीय अटी, धूळ नियंत्रण, पाणी फवारणी, कचरा व्यवस्थापन आणि सुरक्षित वाहतुकीसंबंधी नियमांची प्रभावी अंमलबजावणी होत नसल्याचे चित्र आहे. अशांवर कठोर कारवाई करण्याची मागणी संघटनेने केली आहे.