ड्रेनेज खोदकामामुळे सर्वत्र धूळ

ड्रेनेज खोदकामामुळे सर्वत्र धूळ
नागरिक त्रस्त, पालिकेकडून उपाययोजना नाही
उल्हासनगर, ता. १५ (बातमीदार)ः शहरात अनेक ठिकाणी सांडपाणी वाहिनी टाकण्यासाठी खोदकाम सुरू आहे; मात्र या कामातून मोठ्या प्रमाणात माती बाहेर पडत असून, त्यातून उडणाऱ्या धुळीमुळे नागरिकांना नाका-तोंडावर रुमाल लावून फिरण्याची वेळ आली आहे. या धुळीवर नियंत्रण ठेवण्यासाठी पालिकेकडून उपाययोजना होत नसल्यामुळे नागरिकांमध्ये तीव्र नाराजी आहे.

रेल्वे स्थानक पूर्व परिसरात पार्किंगपासून ते कोयंडे पुतळा आणि शिवसेनेचे संदीप सुर्वे, साक्षी सुर्वे यांच्या जनसंपर्क कार्यालयासमोर खोदकाम सुरू आहे. हे काम महापालिका पाणीपुरवठा विभागाच्या मार्गदर्शनाखाली ठेकेदाराकडून केले जात आहे. आमदार कुमार आयलानी यांच्या निवासस्थानाबाहेरही मोठ्या प्रमाणात खोदकाम करण्यात येत आहे. खोदकामामुळे हे सर्व मार्ग बंद करण्यात आल्याने वाहनचालकांना फेऱ्याने जावे लागत आहे. दोन्ही ठिकाणच्या धुळीमुळे आजूबाजूच्या नागरिकांना दार-खिडक्या बंद करण्याची वेळ आली आहे. याच धुळीमुळे रहिवाशांना आणि ये-जा करणाऱ्या नागरिकांना खोकला व सर्दीचा त्रास होऊ लागला आहे.

नियमांचा ठेकेदाराला विसर
शहीद मारुती जाधव रिक्षा युनियनचे माजी अध्यक्ष राम भोसले यांनी आरोप केला आहे की, असे कोणतेही खोदकाम करताना त्यातून निघणाऱ्या मातीवर पाण्याची फवारणी करणे किंवा जाळ्या टाकणे हे नियम असताना, महापालिकेच्या पाणीपुरवठा विभागाला आणि ठेकेदाराला या नियमांचा विसर पडला आहे. याचा नाहक त्रास नागरिकांना सहन करावा लागत आहे.

पालिकेकडून आश्वासन
ड्रेनेज खोदकामामुळे निर्माण होणाऱ्या धुळीबाबत पाणीपुरवठा विभागाचे उपायुक्त अनंत जवादवार यांच्याशी संपर्क साधला असता, त्यांनी धूळ नियंत्रणात आणण्यासाठी तात्काळ उपाययोजना करण्याचे आदेश संबंधित ठेकेदाराला देण्यात येतील, असे सांगितले.