धारावी स्कूल्स चेस चॅम्पियनशिपमध्ये ४०० हून अधिक विद्यार्थ्यांचा सहभाग

धारावी स्कूल्स चेस चॅम्पियनशिपमध्ये ४०० हून अधिक विद्यार्थ्यांचा सहभाग
ग्रँडमास्टर आर. प्रज्ञानंद यांनी साधला संवाद
सकाळ वृत्तसेवा
मुंबई, ता. १५ : ‘धारावी स्कूल्स चेस चॅम्पियनशिप २०२५’ या स्पर्धेमध्ये ३० हून अधिक शाळांतील ४०० पेक्षा जास्त विद्यार्थ्यांनी सहभाग नोंदवला होता. ग्रँडमास्टर आर. प्रज्ञानंद यांनी धारावीतील तरुण बुद्धिबळपटूंशी संवाद साधला, मोठी स्वप्ने पाहण्याची आणि आपल्या उज्ज्वल भविष्यासाठी विचार करण्याची प्रेरणा त्यांनी दिली.
एनएमडीपीएल आणि अदाणी समूह यांनी या स्पर्धेचे आयोजन केले होते. या उपक्रमाद्वारे शिक्षण, क्रीडा आणि व्यक्तिमत्त्व विकास यांचा सुंदर समन्वय साधत धारावीतील मुलांमध्ये आत्मविश्वास व कौशल्य विकास घडवून आणण्याचे उद्दिष्ट आहे. या चॅम्पियनशिपचे हे पहिले वर्ष असून, पुढील काळात ही स्पर्धा दरवर्षी आयोजित केली जाणार आहे.
ग्रँडमास्टर प्रज्ञानंद यांनी स्पर्धेचे औपचारिक उद्‌घाटन केले. त्यानंतर काही प्रदर्शनीय सामने खेळून त्यांनी विद्यार्थ्यांची उत्सुकता आणि आनंद द्विगुणित केला. मुलांशी मनमोकळ्या संवादातून त्यांनी मन:पूर्वक सराव, प्रामाणिकता आणि पराभवाकडे शिकण्याच्या संधी म्हणून पाहण्याचा संदेश दिला. अनेक विद्यार्थ्यांनी पहिल्यांदाच स्पर्धेत भाग घेतला. विशेषतः मुलींच्या गटांनी उत्कृष्ट कामगिरी करत क्रीडा क्षेत्रातील वाढती समानता आणि व्यापक सहभाग अधोरेखित केला.
विद्यार्थ्यांना संबोधित करताना १९ वर्षीय ग्रँडमास्टर म्हणाले, मी इथून परत जाताना खूप काही घेऊन जात आहे. धारावीतील मुलांची ऊर्जा, जिद्द आणि कुतूहल खरोखर उल्लेखनीय आहे, असे त्‍यांनी सांगितले.