मनोरुग्णालयातील वृक्षतोड प्रकरण

मनोरुग्णालयातील वृक्षांचे सर्वेक्षण
मनसेकडून ‘जिओ टॅगिंग’
ठाणे, ता. १५ : जिल्हा सामान्य रुग्णालयानंतर आता प्रादेशिक मनोरुग्णालयाचा कायापालट करण्याची योजना आखण्यात येत आहे. या विकासकामांच्या आड येणाऱ्या १,६१४ वृक्षांपैकी जवळजवळ ७२४ वृक्ष तोडले जाणार आहेत. या मोठ्या वृक्षतोडीविरोधात राष्ट्रवादी शरद पवार पक्षाने आक्रमक भूमिका घेतल्यानंतर आता महाराष्ट्र नवनिर्माण सेनेनेही याविरोधात आवाज उठवला आहे.
मनसे पर्यावरण अध्यक्ष जय श्रींगारपुरे यांच्या पुढाकाराने मनोरुग्णालयातील वृक्षांचे सविस्तर सर्वेक्षण केले जात आहे. नसेचे कार्यकर्ते येथील वृक्षांना मनसेचा मफलर बांधून त्यांचे जिओ लोकेशन टॅगिंग करत आहेत. प्रत्येक झाडाचा फोटो काढून त्याची नोंद ठेवली जात आहे, जेणेकरून भविष्यात एकही झाड अवैधपणे तोडले जाऊ नये, यासाठी ठोस माहिती संकलित करता येईल.

नाशिक येथे कुंभमेळ्याच्या पार्श्वभूमीवर मोठ्या प्रमाणात होत असलेल्या वृक्षतोडीवरून मनसेप्रमुख राज ठाकरे यांनी नुकताच सरकारला इशारा दिला होता. याच भूमिकेनुसार, मनसे शहर अध्यक्ष रवी मोरे यांच्या मार्गदर्शनाखाली जय श्रींगारपुरे यांनी सोमवारी ठाणे प्रादेशिक मनोरुग्णालयाच्या परिसराला भेट देऊन पाहणी केली.

विकासाच्या नावाखाली भविष्यातील परिणामांचा विचार न करता मोठ्या प्रमाणावर वृक्षतोड केली जात असल्याचे प्रकार सातत्याने समोर येत आहेत. यापूर्वी आरे जंगलातील वृक्षतोडीचे दुष्परिणाम आजही मुंबईकर अनुभवत आहेत. अशा प्रकारची बेजबाबदार वृक्षतोड ठाण्यात होऊ नये, यासाठी मनसेने हा पुढाकार घेतला आहे.

आरोग्याशी खेळ
मुंबई आणि ठाण्यासारख्या महानगरांमध्ये हवेचे प्रदूषण आधीच धोकादायक पातळीवर पोहोचले आहे. अशा परिस्थितीत निष्काळजीने झाडांची कत्तल करणे म्हणजे नागरिकांच्या आरोग्याशी थेट खेळ करण्यासारखे असल्याचा दावा मनसेने केला आहे. तसेच ‘‘मनोरुग्णालय तुमचे असेल, पण झाडे आमची आहेत!’’ असा मनसेने प्रशासनाला स्पष्ट संदेश देत, झाडांचे संरक्षण हा नागरिकांचा हक्क असून, तो जपण्यासाठी मनसे कायम ठामपणे उभी राहील, असा निर्धार या वेळी व्यक्त केला.