एकस्तर वेतनश्रेणी लागू करा

शहापूर, ता. १५ (वार्ताहर) : आदिवासी व पेसा क्षेत्रात कार्यरत असलेल्या शिक्षक व शैक्षणिक कर्मचाऱ्यांना एकस्तर वेतनश्रेणीचा लाभ मिळावा, अशी मागणी शिक्षक भारती संघटनेचे ठाणे जिल्हाध्यक्ष एकनाथ तारमळे यांनी शिक्षणाधिकाऱ्यांकडे निवेदनाद्वारे केली आहे.
आदिवासी व पेसा क्षेत्रात काम करणाऱ्या शिक्षकांना एकस्तर वेतनश्रेणी देण्याचा सरकारचा निर्णय असतानाही विविध अटी व प्रशासकीय त्रुटींमुळे प्रत्यक्ष अंमलबजावणी होत नसल्याचे तारमळे यांनी नमूद केले आहे. आदिवासी विकास विभागाने आश्रमशाळांमध्ये एकस्तर वेतनश्रेणी लागू केली होती; मात्र नंतर त्याची रक्कम परत वसूल करण्याचा तगादा शिक्षकांच्या मागे लागल्याचा आरोपही त्यांनी केला आहे. दरम्यान, नुकत्याच दिलेल्या निर्णयात मुंबई उच्च न्यायालयाने पुनर्याचिकेनुसार नाशिक जिल्ह्यातील आदिवासी व पेसा क्षेत्रात कार्यरत शिक्षकांना एकस्तर वेतनश्रेणी लागू करून फरकाची रक्कम देण्याचे आदेश दिले आहेत. तसेच पालघर जिल्ह्यासाठीही सरकाच्या कक्ष अधिकाऱ्यांनी मुख्य कार्यकारी अधिकाऱ्यांना संबंधित आदेश दिल्याची माहिती तारमळे यांनी दिली.

सरकारकडे प्रस्ताव पाठवा!
ठाणे जिल्ह्यातील शहापूर तालुका हा १०० टक्के आदिवासी व पेसा क्षेत्रात समाविष्ट आहे. त्याचप्रमाणे मुरबाड तालुका ४३.६५ टक्के, तर भिवंडी तालुका ३०.५७ टक्के पेसा क्षेत्रात समाविष्ट आहे. त्यामुळे या तालुक्यांतील आदिवासी व पेसा क्षेत्रात कार्यरत शिक्षक व शैक्षणिक कर्मचाऱ्यांना तातडीने एकस्तर वेतनश्रेणी लागू करावी, तसेच शाळा स्तरावरून सरकारकडे आवश्यक प्रस्ताव पाठवावेत, अशी ठाम मागणी एकनाथ तारमळे यांनी केली आहे.