प्रभाग ५ मध्ये विविध नागरी सेवा शिबिरांचे आयोजन

वाशीमध्ये विविध नागरी सेवा शिबिरे
वाशी, ता. १६ (बातमीदार) : नवी मुंबई महानगरपालिकेच्या प्रभाग क्रमांक ५ मधील सेक्टर १५ मधील अमेय सोसायटी, अष्टविनायक सोसायटी, सप्तश्रुंगी सोसायटी, नवजीवन सोसायटी व पूजा सोसायटी येथे नागरिकांच्या सोयीसाठी मोफत विविध नागरी सेवा शिबिरे पार पडली.
हे शिबिर नवी मुंबई महानगरपालिकेचे माजी आरोग्य समिती सभापती अशोक पाटील व माजी नगरसेविका संगीता पाटील यांच्या पुढाकारातून राबविण्यात आले. शिबिरात नागरिकांना एकाच ठिकाणी आयुष्मान भारत कार्ड, आभा कार्ड, ज्येष्ठ नागरिक ओळखपत्र, आधार कार्ड दुरुस्ती तसेच लाडकी बहीण योजनेसाठी केवायसी या महत्त्वाच्या सेवांची सुविधा उपलब्ध करून दिली गेली.
शिबिराला प्रभागातील नागरिकांचा उत्स्फूर्त प्रतिसाद लाभला. या उपक्रमामुळे नागरिकांचा वेळ व खर्च वाचला असून शासनाच्या विविध योजनांचा लाभ घेणे सुलभ झाले आहे. शिबिराचा लाभ घेताना प्रभागातील सर्व रहिवासी, विविध सोसायट्यांचे पदाधिकारी तसेच प्रमुख मान्यवर मोठ्या संख्येने उपस्थित होते.
नागरिकांच्या दैनंदिन गरजा लक्षात घेऊन भविष्यातही अशा प्रकारचे उपक्रम सातत्याने राबविण्यात येतील, असे आयोजकांच्या वतीने आश्वासन देण्यात आले.