जुईनगर चिंचोली तलावात कबुतरांना खाद्य;

जुईनगर चिंचोली तलावात कबुतरांना खाद्य
फुप्फुसासंबंधित आजारांची भीती ः आबालवृद्धांचे आरोग्य धोक्यात
जुईनगर, ता. १६ (बातमीदार) : हायपर सेन्सिटिव्ह न्यूमेनिया आजार वाढत असल्याने उघड्यावर कबुतरांना खाद्यपदार्थ टाकण्यास पालिकेने अटकाव केला आहे. याबाबत उच्च न्यायालयानेही कबुतरांना खाद्य घालणाऱ्यांविरोधात फौजदारी गुन्हे दाखल करण्याचे आदेश दिल्याने स्थानिक स्वराज्य संस्थांनी याबाबत कडक धोरण अवलंबले आहे, परंतु जुईनगर येथील तलावात कबुतरांना उघडपणे खाद्य टाकले जात असल्याने नागरिकांनी तीव्र नाराजी व्यक्त केली आहे.
जुईनगर येथील चिंचोली तलाव परिसरात ज्येष्ठ नागरिक विरंगुळा केंद्र व उद्यान असल्याने या ठिकाणी आबालवृद्धांचा सतत वावर असतो, शिवाय अनेक धार्मिक विधींसाठी येथे लोकांची रहदारी असते. या पार्श्वभूमीवर, कबुतरांना खाद्य टाकण्यास पालिकेकडून प्रतिबंध करण्यात आला आहे. तरीदेखील काही नागरिकांकडून कबुतरांना नियमित खाद्य टाकणे सुरूच आहे. त्यामुळे तलाव परिसरात बालकांना आणि वृद्धांना कबुतर विष्ठेतून होणाऱ्या आजाराचा धोका निर्माण झाला आहे. या ठिकाणी महापालिकेकडून सुरक्षा रक्षकदेखील नेमण्यात आले आहेत. तरीदेखील चिंचोली तलावात कबुतरांना खाद्य टाकले जात असल्याने पालिका प्रशासनाकडूनच न्यायालयाचे आदेशाचे उल्लंघन होत असल्याचे बोलले जात आहे. शिवाय येथील अनुचित प्रकारांना आळा घालण्यासाठी असलेले सुरक्षा रक्षक याकडे दुर्लक्ष करत असल्याचे सांगण्यात येत आहे.

जनजागृती फलक
नवी मुंबई परिसरात कबुतरांना खाद्यपदार्थ खाऊ न घालण्याचे आदेश पालिकेकडून देण्यात आले आहेत. याबाबत संपूर्ण नवी मुंबईत कबुतरे जमा होत असलेल्या परिसरात जनजागृती फलक लावण्यात आले होते. कबुतरांच्या पिसांसह विष्ठेतून बाहेर पडणाऱ्या जंतूंमुळे फुप्फुसासंबंधित आजार होऊ लागल्याने कबुतरांना खाद्य टाकणाऱ्यांवर कडक निर्बंध पालिकेने आणले होते.

पाम बीच मार्गावर
नवी मुंबई परिसरात पाम बीच मार्गालगत सारसोळे बंदर परिसरासह अनेक्क ठिकाणी कबुतरांना खाद्य टाकले जात होते, मात्र पालिकेने घेतलेल्या आक्रमक भूमिकेने अनेक ठिकाणी खाद्य टाकणे बंद झाले होते. पाम बीच मार्गावर कोणतीही रहिवासी वस्ती नसताना या ठिकाणी पालिकेच्या आवाहनाला प्रतिसाद मिळाला, मात्र अनेक रहिवासी वस्ती असलेल्या ठिकाणी आजाराचा धोका असताना कबुतरांना खाद्य टाकण्यात येत असल्याचे समोर आले आहे.

लक्षणे
ताप, थंडी वाजून येणे.
कोरडा खोकला.
दम लागणे किंवा श्वास घेण्यास त्रास होणे.
थकवा आणि अशक्तपणा.
छातीत दुखणे.
दीर्घकाळ राहिल्यास फुप्फुसे कडक होतात.