सुर्या नदीतून जीवघेणा प्रवास

सूर्या नदीतून जीवघेणा प्रवास
कोसेसरी-भवाडीला जोडणाऱ्या पुलाचे काम संथ गतीने
कासा, ता. १५ (बातमीदार)ः डहाणू तालुक्यातील कोसेसरी-भवाडी परिसराला जोडणाऱ्या पुलाचे बांधकाम संथ गतीने सुरू आहे. पावसाळ्यापूर्वी हा पूल पूर्ण होणार की नाही, याबाबत संभ्रम असल्याने विद्यार्थी, ग्रामस्थांचा जीवघेणा प्रवास सुरूच आहे.
पावसाळ्यात सूर्या नदीला मोठा पूर येत असल्याने नदीपात्रात पाणी असते. त्यामुळे कोसेसरी-भवाडी तसेच तीन ते चार गावांतील नागरिकांचा प्रवास अधिकच धोकादायक ठरतो. प्राथमिक शिक्षणानंतर पुढील शिक्षणासाठी विद्यार्थ्यांना कासा, डहाणू येथे जावे लागते, मात्र पूल नसल्याने विद्यार्थ्यांना लाकडी नावेतून किंवा तराफ्यातून नदी पार करावी लागते. कासा, तलवाडा येथे जाण्यासाठी सायवन मार्गे १८ ते २० किलोमीटरचा वळसा घालून जावे लागते. या मार्गावर प्रवासी वाहनांचीही कमतरता असल्याने वेळ तसेच खर्चही अधिक होतो.
--------------------------------------
ग्रामस्थांमध्ये साशंकता
या पुलासाठी २१ कोटींचा निधी मंजूर करण्यात आला. लोकसभा निवडणुकीची आचारसंहिता लागू होण्याच्या एक दिवस आधी मान्यता देण्यात आली होती, पण पुलाच्या कामाचे उद्घाटनही वाजत-गाजत झाले. या कार्यक्रमाला पालघरचे आमदार राजेंद्र गावित, डहाणूचे आमदार विनोद निकोले, पालघर जिल्हा परिषदेचे माजी अध्यक्ष प्रकाश निकम तसेच माजी आमदार श्रीनिवास वनगा उपस्थित होते, पण पुलाचे बांधकाम संथ गतीने सुरू आहे.
----------------------------------------
कायमस्वरूपी पूल होण्यासाठी निधी मंजूर झाला आहे, मात्र बांधकामाची गती अत्यंत संथ आहे. प्रशासनाने तातडीने काम पूर्ण करण्याची गरज आहे.
- शैलेश करमोडा, माजी जिल्हा परिषद सदस्य
़़़़ः-------------------------
पुलासाठी २१ कोटींचा निधी मंजूर आहे, मात्र निधीअभावी काम संथ गतीने सुरू आहे. त्यासाठी प्रशासनाकडे पाठपुरावा सुरू आहे.
- महेंद्र किणी, कार्यकारी अभियंता, बांधकाम विभाग.