निसर्ग प्रेमींना चिंता वणव्याची

खारघरचा डोंगर आगीच्या विळख्यात
सात दिवसांत तिसऱ्यांदा वणवा ः वनसंपदा नष्ट, पर्यावरणप्रेमींमध्ये संताप
खारघर, ता. १५ (बातमीदार) : खारघर परिसरातील डोंगरावर सात दिवसात तिसऱ्यांदा डोंगरावर आग लावण्यात आल्याची घटना घडली. या वणव्यामुळे डोंगरावरील वनसंपदा नष्ट झाल्याने पर्यावरण प्रेमींमध्ये संतापाचे वातावरण आहे. या वणव्यामुळे झाडांची हानी होवू नये यासाठी वन विभागाने डोंगराच्या पायथ्याशी गवताची छाटणी करून जळीत पट्टा तयार करावा, अशी मागणी पर्यावरण प्रेमींकडून केली जात आहे.
पनवेल वन विभाग आणि खारघर परिसरातील पर्यावरण प्रेमींनी खारघर डोंगरावर मोठ्या प्रमाणात रोप लागवड केली आहे. पर्यावरण प्रेमी स्वखर्चाने पाणी देवून झाडांचे संगोपन करतात. यातून डोंगर आणि पायथ्याशी आठ ते बारा फुटापर्यंत झाडे मोठी झाली आहेत. परंतु, ८ ते १४ डिसेंबर या सात दिवसांच्या कालावधीत माथेफिरूकडून बेलपाडा आणि सेक्टर पस्तीस लगत डोंगरावर आग लावल्याने शेकडो झाडे जळून खाक झाली. या वणव्यात विविध प्रकारची झाडे, वनौषधी, दुर्मिळ प्रजापती, लहान-मोठ्या रोपांची हानी झाली आहे.

योग्य कारवाई करणार
खारघर आणि ओवे डोंगरावरील वणव्यामुळे वनसंपदेची हानी होवू नये यासाठी वन विभागाने गवताची कापणी करून जळीत पट्टा तयार करण्याची मागणी पर्यावरण प्रेमींकडून केली जात आहे. या संदर्भात पनवेल वन विभाग कार्यालयात विचारणा केली असता, वणवा लावणाऱ्यांचा शोध घेवून योग्य ती कारवाई केली जाईल. तसेच, या संदर्भात पोलिस ठाण्यात पत्रही देण्यात आल्याचे सांगितले आहे.