पर्यटक फ्लेमिंगो, बोटिंग सफारीच्या प्रतीक्षेत

वाशी, ता. १५ (बातमीदार) : दरवर्षी हिवाळ्यामध्ये साधारणपणे ऑक्टोबरअखेरीस व नोव्हेंबर ते डिसेंबरपर्यंत फ्लेमिंगो पक्ष्यांचे मोठ्या प्रमाणात आगमन होते. त्यांचा अधिवास साधारणत: तीन ते चार महिन्यांचा असतो, मात्र यंदा नोव्हेंबरमध्येही पाऊस सुरू होता. त्यामुळे नवी मुंबई शहरात फ्लेमिंगोचे स्थलांतर होण्यास उशिरा सुरुवात झाली आहे. हे विदेशी पक्षी मोठ्या प्रमाणात न आल्यामुळे कांदळवन कक्षांकडून सुरू असणारी बोटिंग सफारी अद्यापपर्यंत सुरू करण्यात आलेली नाही. त्यामुळे पर्यटक फ्लेंमिगो बोट सफारीच्या प्रतीक्षेत आहे.

फ्लेमिंगो म्हणजे रोहित पक्षी हे इराण, अफगाणिस्तान आणि इस्रायलमधून भारतातील विविध पाणथळ क्षेत्रात हिवाळ्यादरम्यान येतात. गुजरातच्या कच्छमधून हजारो किमीचा प्रवास करून हे परदेशी पक्षी समुद्रकिनारी किंवा पाणथळ भागात येतात. तसेच नोव्हेंबर ते जास्तीत जास्त जूनपर्यंत वास्तव्यास असतात. त्यांचा मुक्काम कच्छव्यतिरिक्त माहूल-शिवडी, नवी मुंबईत असतो. ऑक्टोबरअखेरीस किंवा नोव्हेंबरच्या सुरुवातीलाच त्यांच्या आगमनाची सुरुवात होते, मात्र यंदा नोव्हेंबरपर्यंत मान्सून लांबला होता. नवी मुंबई शहरात म्हणावी, तशी थंडीची चाहूल लागली नाही. त्यामुळे पक्षीप्रेमी फ्लेमिंगो अधिवासाच्या प्रतीक्षेत आहे.

नवी मुंबई शहरात नेरूळ, उरण, तसेच ऐरोली-ठाणे या ठिकाणी मोठ्या प्रमाणावर फ्लेमिंगोचे दर्शन होते. फ्लेमिंगोच्या आगमनाची चाहूल लागताच पर्यटक, पक्षीप्रेमी यांच्या फ्लेमिंगो पाहण्यासाठी नजरा लागतात. दिवाळीच्या सुट्टीत पर्यटकांना बोटिंग सफारी मिळाली नाही, पण आता नाताळच्या सुट्टीत तरी बोटिंग सफारी सुरू होईल का, याचे वेध पर्यटकांना लागले आहे.

ऐरोली येथे जवळून पाहण्याची सोय
ऐरोली येथील सागरी जैवविविधता केंद्रात विशेषत: या परदेशी पाहुण्यांना जवळून पाहता यावे, याकरिता बोटिंग सफर सुरू असते, मात्र अद्याप त्या ठिकाणी मोठ्या प्रमाणात परदेशी पाहुण्यांचे आगमन झाले नसल्याने ही बोटिंग सफरी सुरू करण्यात आलेली नाही. त्यामुळे पर्यटक बोटिंग सफारीच्या प्रतीक्षेत आहे.

रोहित पक्ष्यांचे अद्यापपर्यंत ठाणे खाडी परिसरात आगमन न झाल्यामुळे बोटिंग सुरू करण्यात आलेली नाही. ज्यावेळी मोठ्या प्रमाणात पक्षी येण्यास सुरुवात होईल, त्यावेळी बोटिंग सुरू करण्यात येईल. यंदा पावसामुळे फ्लेमिंगो येण्यास उशीर झाला आहे.
- प्रशांत बहादुरे, वनपरिक्षेत्र अधिकारी