काळा किल्‍ला सेक्‍टर ५ येथील रहिवाशांच्या संघर्षाला यश

काळा किल्‍ला सेक्‍टर पाच येथील रहिवाशांच्या संघर्षाला यश
परिशिष्ट दोनची पहिली यादी जाहीर
धारावी, ता. १५ (बातमीदार) : धारावीतील काळा किल्ला सेक्टर क्रमांक पाच येथील रहिवाशांचा पुनर्विकासासाठी गेल्या अनेक वर्षांपासून सुरू असलेल्या संघर्षाला अखेर निर्णायक यश मिळाले आहे. पुनर्विकास कृती समितीच्या नेतृत्वाखाली काही दिवसांपूर्वी स्थानिकांनी माटुंगा येथील धारावी पुनर्विकास प्रकल्प कार्यालयावर काढलेल्या धडक मोर्चानंतर डीआरपीच्या वतीने पुनर्वसन करण्यात येणाऱ्या रहिवाशांची परिशिष्ट दोनची पहिली यादी जाहीर झाली आहे.
यादी जाहीर झाल्‍याने धारावी काळा किल्ला परिसरातील रहिवाशांमध्ये आनंदाचे वातावरण आहे. धारावी पुनर्विकास प्रकल्पांतर्गत सेक्टर पाचमध्ये म्हाडाने उभारलेल्या नवीन इमारतींमध्ये संग्रामनगर, शिवगंगा रहिवासी संघ, रेवा फोर्ट कॉलनी, क्रांतीनगर, सीताबाई टिकेकर चाळ, काजरोळकर चाळ, काळा किल्ला तसेच आसपासच्या परिसरातील रहिवाशांचे पुनर्वसन करण्यात यावे, या प्रमुख मागणीसाठी रहिवाशांनी धारावी पुनर्विकास प्रकल्पाच्या म्हाडा वांद्रे येथील कार्यालयावर कृती समितीचे प्रमुख गणेश खाडे यांच्या नेतृत्वाखाली मोर्चा काढला होता. स्थानिक रहिवाशांना विश्वासात न घेता कोणतेही निर्णय घेतले जाऊ नयेत, अशी भूमिका मांडण्यात आली होती. सेक्टर पाचमधील रहिवाशांच्या संघटित संघर्षामुळे येथील रहिवाशांच्या पुनर्वसन प्रक्रियेला गती मिळाली असून, एकजुटीच्या बळावर प्रशासनालाही निर्णय घेण्यास भाग पाडता येते, याचे हे एक ठळक उदाहरण ठरले असल्याचे खाडे यांनी सांगितले.