शिवसेनेच्या कार्यकर्त्यांनी चोरट्यांचा डाव उधळला

अंबरनाथ, ता. १५ (वार्ताहर) : पश्चिमेकडील पनवेलकर सोसायटी फेज १ परिसरात शनिवारी रात्री सुमारे दोनच्या सुमारास चोरीच्या उद्देशाने हत्यारांसह फिरणाऱ्या तीन चोरट्यांना शिवसेनेचे कार्यकर्ते आकाश चलवादी व त्यांच्या भावांनी धाडसाने पळवून लावले. ही संपूर्ण घटना सोसायटीतील सीसीटीव्ही कॅमेऱ्यात कैद झाली आहे. याप्रकरणी अंबरनाथ पोलिस ठाण्यात गुन्हा दाखल करण्यात आला आहे. सध्या अंबरनाथमध्ये अनेक घरांतील कर्ते पुरुष प्रचारासाठी रात्री उशिरापर्यंत घराबाहेर असतात. याच संधीचा गैरफायदा घेत शनिवारी रात्री तीन चोरटे पनवेलकर सोसायटी फेज १च्या कम्पाउंडवरून आत शिरले आणि घरफोडीची तयारी करू लागले. याच वेळी शिवसेनेचे उमेदवार राजेंद्र वाळेकर यांचा प्रचार करून घरी परतत असताना आकाश चलवादी व त्यांच्या भावांच्या निदर्शनास संशयास्पद हालचाली आल्या. त्यांनी तत्काळ दुचाकीचा हॉर्न वाजवून चोरट्यांना पळवून लावण्याचा प्रयत्न केला. चोरटे लपून बसल्याचे लक्षात येताच चलवादी भावांनी दगडफेक केली. त्यामुळे घाबरून चोरट्यांनी घटनास्थळावरून पळ काढला.