वाहनाच्या धडकेत पादचाऱ्याचा मृत्यू

पनवेल (वार्ताहर) : जुन्या मुंबई-पुणे मार्गाच्या बाजूने चालत जाणाऱ्या एका पादचाऱ्याला अज्ञात वाहनाने धडक दिल्याने त्याचा मृत्यू झाल्याची घटना रविवारी (ता. १४) रात्री भोकरपाडा येथे घडली. बळीराम विशुनदेव मंडल (वय ५१) हा पनवेल तालुक्यातील भोकरपाडा येथील ऋषीकेश कन्स्ट्रक्शनच्या प्रकल्पावर काम, तसेच तो त्याच ठिकाणी राहत होता. रविवारी रात्री पावणेनऊ वाजण्याच्या सुमारास जुन्या मुंबई-पुणे रस्त्याच्या बाजूने पायी चालत समता नगर येथे किराणा सामान आणण्यासाठी जात होता. याचवेळी अज्ञात वाहनाने त्याला धडक दिली. त्याला इतर वाहनचालकांनी रुग्णालयात दाखल केले, मात्र त्यापूर्वीच त्याचा मृत्यू झाला. या अपघातानंतर धडक देणाऱ्या वाहनचालकाने अपघाताची माहिती न देता, तसेच जखमीला कुठल्याही प्रकारची मदत न करता पळून गेल्याने पनवेल तालुका पोलिसांनी त्याच्याविरोधात गुन्हा दाखल केला आहे.