राज्यस्तरीय मास्टर्स क्रीडा स्पर्धेत क्रीडा शिक्षकांचे घवघवीत यश

क्रीडा शिक्षकाचे राज्यस्तरीय स्पर्धेत घवघवीत यश
कासा, ता. १५ (बातमीदार) : महाराष्ट्र राज्य मास्टर्स असोसिएशनतर्फे १३ व १४ डिसेंबर रोजी पुणे (भोसरी) येथे आयोजित राज्यस्तरीय मास्टर्स क्रीडा स्पर्धेत डहाणू तालुक्यातील पूज्य आचार्य भिसे विद्यालय, कासा येथील क्रीडा शिक्षक नीलेश गायकवाड यांनी उत्कृष्ट कामगिरी केली. नीलेश गायकवाड यांनी ॲथलेटिक्स प्रकारात पालघर जिल्ह्याचे प्रतिनिधित्व करताना उंच उडीमध्ये सुवर्णपदक आणि तिहेरी उडीमध्ये रौप्यपदक पटकावले. या घवघवीत यशामुळे त्यांची राष्ट्रीय मास्टर्स क्रीडा स्पर्धेसाठी निवड झाली आहे. त्यांच्या या उल्लेखनीय कामगिरीबद्दल कासा व डहाणू परिसरातून त्यांच्यावर अभिनंदनाचा वर्षाव होत आहे. सदर स्पर्धेचे आयोजन संघटना सचिव बाळू चव्हाण यांच्या मार्गदर्शनाखाली करण्यात आले.