ठाण्यात महायुतीत बिघाडी

ठाण्यात महायुतीत बिघाडी
अजित पवार गट स्वबळावर लढणार!
सकाळ वृत्तसेवा
ठाणे, ता. १५ ः स्थानिक स्वराज्य संस्थांच्या निवडणुका महायुतीमध्ये लढवण्याबाबत वरिष्ठ नेत्यांमध्ये एकमत झाले असले तरी स्थानिक पातळीवर पदाधिकाऱ्यांची व कार्यकर्त्यांचे एकमत होत नसल्याने याला ग्रहण लागल्याचे दिसत आहे. ठाणे पालिका निवडणुकीत महायुतीचा घटक पक्ष असलेल्या राष्ट्रवादी काँग्रेस (अजित पवार गट) पक्षाने स्वबळाचा नारा दिला आहे. अजित पवार गटाचे ठाणे शहराध्यक्ष नजीब मुल्ला यांनी पत्रकारांशी बोलताना ही माहिती दिली, ज्यामुळे ठाण्यात महायुतीत बिघाडी झाल्याचे स्पष्ट झाले आहे.

लोकसभा आणि विधानसभा निवडणुकीत भाजप, शिवसेना (शिंदे गट) आणि राष्ट्रवादी (अजित पवार गट) या तीन पक्षांनी एकत्र निवडणूक लढवली होती. त्यामुळे स्थानिक स्वराज्य संस्था आणि जिल्हा परिषदेच्या निवडणुकीतही महायुती म्हणूनच लढण्याचे एकमत वरिष्ठ नेत्यांमध्ये झाले होते; मात्र अनेक ठिकाणी स्थानिक स्वराज्य संस्थांच्या निवडणुकीत तिन्ही पक्षांमधील नेत्यांचे अंतर्गत वाद चव्हाट्यावर आले होते, ज्यामुळे स्थानिक पातळीवर महायुती होणार नाही, अशी चर्चा होती.

दोन दिवसांपूर्वी भाजप आणि शिंदे गटाच्या शिवसेनेच्या नेत्यांनी महायुतीमध्येच निवडणुका लढवण्याचे जाहीर केले होते. या पार्श्वभूमीवर, अजित पवार गटाचे ठाणे शहराध्यक्ष नजीब मुल्ला यांनी पक्षाची भूमिका स्पष्ट केली की, आम्ही महायुतीचा घटक पक्ष असून, महायुतीचा एक अंग आहोत. असे असले तरी, आम्ही ठाणे महापालिका निवडणुकांबाबत भूमिका मांडली आहे की, आम्ही भाजप आणि सेनेसोबत युती करणार नाही. तशा भावना आम्ही वरिष्ठ नेत्यांना कळविल्या आहेत.

राजकीय वातावरण तापले
मुल्ला यांनी जाहीरपणे स्वबळावर निवडणूक लढवण्याची घोषणा केल्यामुळे, ठाणे महापालिका निवडणुकीत भाजप आणि शिंदे गटाच्या शिवसेनेला अजित पवार गटाशिवाय लढावे लागण्याची चिन्हे दिसत आहेत. या निर्णयामुळे ठाण्यातील राजकीय वातावरण चांगलेच तापले आहे.