373 मुंबईकरांचे घरांचे स्वप्न पूर्ण

३७३ मुंबईकरांचे घरांचे स्वप्न पूर्ण  
आणखी ३६२ अर्जदार प्रतीक्षा यादीवर
सकाळ वृत्तसेवा
मुंबई, ता. १५ ः  मुंबई महापालिकेतर्फे विकास नियंत्रण व प्रोत्साहन नियमावली २०३४ अंतर्गत ४२६ घरांची संगणकीय सोडत शनिवारी (ता. १३) पालिका मुख्यालयात ऑनलाइन पद्धतीने काढण्यात आली. या सोडत प्रक्रियेदरम्यान एकूण ४२६ घरांची सोडत यशस्वीपणे पार पडली. यात ३७३ अर्जदारांचे घरांचे स्वप्न पूर्ण झाले. मुंबईतील  ३६२ अर्जदार या प्रक्रियेदरम्यान प्रतीक्षा यादीवर आहेत.
सदनिका विजेत्या यशस्वी अर्जदारांना ई-मेलद्वारे माहिती कळविण्यात येणार आहे. तसेच कागदपत्र पडताळणीसाठी पुढील प्रक्रियेसाठी संपर्क साधण्यात येईल. पत्रही पाठवण्यात येईल. सोडत प्रक्रियेतील यशस्वी तसेच प्रतीक्षा यादीवरील अर्जदारांची माहितीही पालिकेच्या संकेतस्थळावरही प्रसिद्ध करण्यात येणार आहे. दरम्यान, लवकरच २९६ घरांसाठी सोडत प्रक्रिया राबवली जाणार असल्याची माहिती प्रशासनाने दिली.
पालिकेच्या बाजार विभागामार्फत बृहन्मुंबई महानगरपालिका मंडईमध्ये पाच टक्के दिव्यांग आरक्षणांतर्गत दिव्यांग नागरिकांना व्यवसाय करण्याकरिता अनुज्ञापत्र व गाळे,  स्टॉल जागा आदींचे ऑनलाइन पद्धतीद्वारे सोडतदेखील काढण्यात आली.  या सोडतीदरम्यान एकूण ४३ यशस्वी दिव्यांग लाभार्थी अर्जदारांची घोषणा करण्यात आली. प्रतीक्षा यादीवरील ४३ दिव्यांग लाभार्थी अर्जदारांची यादीही या वेळी जाहीर करण्यात आली आहे. बृहन्मुंबई महानगरपालिकेच्या संकेतस्थळावर ही माहिती उपलब्ध करून दिली जाणार आहे.

दिव्यांगांनाही सधी
मंडईमध्ये दिव्यांग आरक्षणांतर्गत एकूण ४३ लाभार्थींना मंडईनिहाय अनुज्ञापत्र व गाळे / जागावाटप करण्यात येईल. मंजूर धोरणानुसार दिव्यांग लाभार्थींची आवश्यक कागदपत्रांची तपासणी पूर्ण झाल्यानंतर अनुज्ञापत्र व गाळे, जागावाटपाबाबतची कार्यवाही करण्यात येईल, असे प्रशासनाकडून सांगण्यात आले.

आणखी २९६ सदनिकांसाठी सोडत
बृहन्मुंबई महानगरपालिकेतर्फे विकास नियंत्रण व प्रोत्साहन नियमावली २०३४ अंतर्गत प्राप्त आणखी २९६ सदनिकांसाठी सोडत प्रक्रिया राबविण्यात येणार आहे. बृहन्मुंबई महानगरपालिका क्षेत्रातील विविध भागांमध्ये या सदनिका उपलब्ध आहेत. या सदनिकांबाबतची माहिती बृहन्मुंबई महानगरपालिकेमार्फत लवकरच जाहीर करण्यात येणार आहे.