पालकांसाठी मनोरंजक खेळाच्या स्पर्धा

पालकांसाठी मनोरंजक खेळांच्या स्पर्धा
कळवा, ता. १५ (बातमीदार) : सध्या शाळांमध्ये क्रीडा स्पर्धा आणि स्नेहसंमेलनाची धूम सुरू आहे; मात्र विद्यार्थ्यांनाच नव्हे तर पालकांनाही आपल्या पाल्याच्या शाळेतील खेळांमध्ये सहभागी होता यावे आणि संसार सांभाळताना थोडा वेळ काढून आपले कौशल्य विकसित करता यावे, या उद्देशाने कळव्यातील कै. गोपाळराव पाटील शिक्षण प्रसारक मंडळाच्या शिशुविहार विद्यामंदिरने एक अभिनव उपक्रम राबवला.
सोमवारी (ता. १५) शाळेत महिला पालकांसाठी खास मनोरंजक खेळांच्या स्पर्धांचे आयोजन करण्यात आले होते. हिल स्टेशन पार करणे, फुगे फोडणे, प्लॅस्टिक बाटल्या गोळा करणे, गोलात धावणे आदी मनोरंजक स्पर्धा घेण्यात आल्या. पालकांना शाळेतील उपक्रमात सहभागी करून घेणे आणि त्यांना खेळातून पारितोषक जिंकण्याची संधी देणे, हा उद्देश होता.
स्पर्धेत विविध खेळांतून प्रथम, द्वितीय, तृतीय असे एकूण १२ क्रमांक काढण्यात आले. विजयी महिला पालकांना शाळेच्या बक्षीस वितरण समारंभात विद्यार्थ्यांबरोबरच बक्षीस देऊन गौरविण्यात येणार आहे. या सर्व स्पर्धांचे यशस्वी नियोजन शाळेतील महिला शिक्षिका कमिटीने केले होते.