आगरी महोत्सवाच्या भव्यतेने भारावलो : डॉ. श्रीकांत शिंदे

आगरी महोत्सवाच्या भव्यतेने भारावलो
खासदार डॉ. श्रीकांत शिंदे यांची आगरी महोत्सवाला भेट
कल्याण, ता. १५ (वार्ताहर) : अखिल भारतीय आगरी महोत्सवाच्या भव्यतेने भारावलो आहे. या महोत्सवातून आगरी समाजाबरोबरच डोंबिवलीच्या संस्कृतीचेही संवर्धन होत आहे, असे भावपूर्ण उद्गार शिवसेनेचे खासदार डॉ. श्रीकांत शिंदे यांनी रविवारी (ता. १४) काढले. डोंबिवलीत २१ वा अखिल भारतीय आगरी महोत्सव सुरू असून, श्रीकांत शिंदे यांनी महोत्सवाला भेट दिली. या वेळी ते बोलत होते.
आगरी समाजाच्या प्रगतीबरोबरच डोंबिवलीची संस्कृतीही वृद्धींगत करण्याचे कार्य आगरी युथ फोरमकडून केले जात आहे. या उत्सवाची डोंबिवलीकरांकडून आतुरतेने वाट पाहिली जाते. अशा पद्धतीने या महोत्सवाने नागरिकांच्या मनात स्थान निर्माण केले आहे, असे प्रतिपादन श्रीकांत शिंदे यांनी केले. या वेळी भाऊसाहेब चौधरी, राजेश कदम यांच्यासह महोत्सवाचे कार्याध्यक्ष जालिंदर पाटील, सरचिटणीस रामकृष्ण पाटील, खजिनदार पांडुरंग म्हात्रे, चिटणीस गुरुनाथ म्हात्रे आदी उपस्थित होते.
संत सावळाराम महाराज म्हात्रे यांच्या स्मारकासाठी १० एकर जागा मंजूर करण्यासाठी उपमुख्यमंत्री एकनाथ शिंदे व खासदार श्रीकांत शिंदे यांचे योगदान महत्त्वाचे आहे, याचा उल्लेख करीत आगरी युथ फोरमचे अध्यक्ष गुलाब वझे यांनी कृतज्ञता व्यक्त केली.