एमडी ड्रग्जचा कारखाना उध्वस्त

एमडी ड्रग्जचा कारखाना उद्ध्वस्त
राजस्थानमधील कारवाईत १०० कोटींचा मुद्देमाल जप्त

भाईंदर, ता. १५ (बातमीदार) : एमडी (मॅफेड्रॉन) या अमली पदार्थाचा राजस्थानमधील झुनझुनू येथील कारखाना उद्ध्वस्त करण्यात रविवारी (ता. १४) पोलिसांना यश आले. या कारखान्यातून सुमारे १०० कोटी रुपयांचे एमडी जप्त करण्यात आले आहे. याप्रकरणी ११ जणांना अटक करण्यात आली असून त्यात दाऊद टोळीशी संबंधित गुन्हेगारांचाही समावेश आहे. मिरा-भाईंदर, वसई-विरार पोलिसांच्या अमली पदार्थविरोधी पथक एक व गुन्हे शाखा यांनी ही कामगिरी संयुक्तरीत्या पार पाडली.

काशी मिरा पोलिसांनी ४ ऑक्टोबरला संशयावरून सहा जणांची झडती घेतली होती. त्यांच्याकडे एक कोटी रुपये किमतीचा ५०१.६ ग्रॅम वजनाचा एमडी हा अमली पदार्थ सापडला. या गुन्ह्याचा तपास करत असताना पोलिसांनी गुजरातमधून आणखी चार आरोपींना अटक केली. या आरोपींच्या आधारे पोलिस राजस्थानमधील झुनझुनूपर्यंत पोहोचले. त्याठिकाणी एका पोल्ट्री फार्मच्या आड एमडी तयार करण्याचा कारखाना सुरू असल्याचे आढळून आले. या कारखान्यावर पाळत ठेवून पोलिसांनी त्यावर छापा टाकला. त्याठिकाणी पोलिसांना हवा असलेला आरोपी अनिल विजयपाल सिहाग हा हाती लागला, त्याचप्रमाणे या वेळी सुमारे १० किलो एमडी, एमडी तयार करण्याची रसायने तसेच अन्य साधनसामग्री असा एकूण रुपये १०० कोटी किमतीचा मुद्देमाल जप्त करण्यात आला. हा कारखाना सुमारे एक वर्षांपूर्वी सुरू करण्यात आल्याची माहिती पोलिसांनी दिली.

..
नऊ आरोपी सक्रिय गुन्हेगार
झुनझुनू येथील कारखान्यातून यापूर्वीच शंभर कोटी रुपयांचे एमडी महाराष्ट्र, गुजरात व राजस्थान भागात वितरित करण्यात आले होते व आणखी १०० कोटींचे एमडी तयार करण्याचे काम सुरू होते. अटक करण्यात आलेल्या ११ आरोपींपैकी नऊ आरोपी सक्रिय गुन्हेगार असून त्यांच्यावर अनेक गुन्हे दाखल आहेत. तसेच काही आरोपी दाऊद टोळीशी संबंधित आहेत. एमडी तयार करण्यासाठी काही बंदी घालण्यात आलेली रसायनेदेखील वापरण्यात येत होती. ही रसायने आरोपींनी कुठून आणली, याचा तपास सुरू आहे, अशी माहिती पोलिस आयुक्त निकेत कौशिक यांनी दिली.