पतीच्या विवाहबाह्य संबंधातून पत्नीची हत्या

पतीच्या विवाहबाह्य संबंधातून पत्नीची हत्या
नालासोपारा, ता. १५ (बातमीदार) : पतीच्या विवाहबाह्य संबंधामुळे सुरू असलेल्या वादविवादातून पतीने पत्नीची गळा दाबून हत्या केल्‍याची घटना उघडकीस आली आहे. हत्या करून मृतदेह शेतातील तलावात फेकून पत्नी बेपत्ता झाल्याचा बनाव पतीने रचला; मात्र शवविच्छेदन अहवालातून ही हत्या झाल्याचे उघड झाले. याप्रकरणी मांडवी पोलिसांनी सोमवारी (ता. १५) हत्येचा गुन्हा दाखल करून आरोपी पतीला अटक केली.

विजय चव्हाण (वय ३०) असे आरोपीचे नाव असून, स्वाती असे हत्या झालेल्या पत्नीचे नाव आहे. हे दाम्पत्य विरारच्या मांडवी परिसरातील वडघर या ठिकाणी वास्तव्यास आहे. आरोपी विजयचे गावातीलच एका विवाहित स्त्रीसोबत अनैतिक संबंध होते. या विवाहबाह्य संबंधावरून चव्हाण दाम्पत्यामध्ये वादविवाद सुरू होते. दरम्यान, रविवारी (ता. १४) हे दाम्पत्य वडघर येथील जंगलातील शेतात कामासाठी गेले होते. याच वेळी विजयला संबंधित महिलेचा फोन आल्याचे स्वातीने पाहिले. यावरून दोघांमध्ये भांडण झाले. याच रागातून विजयने स्वातीची गळा दाबून हत्या केली. त्यानंतर तिचा मृतदेह शेजारील तलावात टाकून सायंकाळी घरी जाऊन पत्नी बेपत्ता असल्याचा बनाव रचला होता. त्यानंतर स्थानिकांच्या शोधमोहिमेत स्वातीचा मृतदेह तलावात आढळून आला. यावरून रात्री १०च्या सुमारास मांडवी पोलिस ठाण्यात प्रथम अकस्मात मृत्यूची नोंद करून मृतदेह शवविच्छेदनासाठी पाठविला होता. दरम्यान, सोमवारी (ता. १५) मृतदेहाच्या शवविच्छेदन अहवालात गळा दाबून हत्या केल्याचे उघड झाले.

आरोपीला अटक
मांडवी पोलिस ठाण्याचे वरिष्ठ पोलिस निरीक्षक रणजित आंधळे यांनी सांगितले की, ‘याप्रकरणी प्रथम अकस्मात मृत्यूची नोंद करण्यात आली. याबाबत पतीच्या संशयास्पद हालचालीवरून त्याचा कसून तपास केला असता त्याने पत्नीची गळा दाबून हत्या केली असल्याचे कबूल केले आहे. आम्ही हत्येचा गुन्हा दाखल करून आरोपीला अटक केली आहे.