तेजस्वी घोसाळकर यांचा भाजपा प्रवेश

तेजस्वी घोसाळकर यांचा भाजपमध्ये प्रवेश
ठाकरे गटाला धक्का

सकाळ वृत्तसेवा
मुंबई, ता. १५ ः शिवसेना (उद्धव बाळासाहेब ठाकरे) पक्षाच्या माजी नगरसेविका तेजस्वी घोसाळकर यांनी भाजपमध्ये प्रवेश केला आहे. मुंबई भाजप अध्यक्ष अमित साटम यांनी घोसाळकर यांचे स्वागत केले. ‘प्रभागात विकासाची कामे करण्यासाठी तसेच अभिषेकच्या हत्येप्रकरणी चौकशीला गती येण्यासाठी मी भाजपमध्ये प्रवेश केला,’ अशी प्रतिक्रिया घोसाळकर यांनी दिली. मुंबई महापालिकेच्या तोंडावर उद्धव ठाकरे यांच्या पक्षाला हा धक्का मानला जात आहे.
दादर येथील भाजपच्या वसंत स्मृती कार्यालयात आज सकाळी हा पक्षप्रवेश झाला. या वेळी भाजपचे आमदार प्रवीण दरेकर उपस्थित होते. तेजस्वी घोसाळकर या दिवंगत अभिषेक घोसाळकर यांच्या पत्नी, तर माजी आमदार विनोद घोसाळकर यांच्या सून आहेत. मुंबई महापालिकेवर महायुतीचा भगवा झेंडा फडकविण्याचा निर्धार भाजपने केला आहे. आज निवडणुकीची आचार संहिता लागू झाली असून, आजच तेजस्वी घोसाळकर यांनी भाजपच प्रवेश केल्याने उत्तर मुंबईत भाजपची ताकद वाढली आहे. दरम्यान, तेजस्वी घोसाळकर यांनी पक्षातील सर्व पदांचा राजीनामा दिल्यावर उद्धव ठाकरे यांनी त्यांची नाराजी दूर केली होती. तसेच त्यांची दहिसर विधानसभा प्रमुखपदी नियुक्ती करण्यात आली होती. अशातच मुंबै बँकेत तेजस्वी घोसाळकर यांची संचालकपदी निवड करून भाजपने मुंबईत राजकीय खेळी केली होती.
‘माझ्या प्रभागात विकासाची कामे करण्यासाठी हा निर्णय घेतलेला आहे. खूप काही गोष्टी बोलायच्या आहेत; पण मला ते कसे बोलावे हे समजत नाही. मला विकासाची कामे करायची आहेत आणि माझी ही सर्व कामे देवेंद्र फडणवीस यांच्या नेतृत्वाखाली होतील, अशी मी अपेक्षा करते. माझ्या भाजप प्रवेशाने अभिषेकच्या हत्येप्रकरणी चौकशीला गती येईल, भाजप जी जबाबदारी देईल ती पूर्ण करेन, असेही तेजस्वी घोसाळकर म्हणाल्या.
...
कुटुंबप्रमुख म्हणून मी तेजस्वीशी बोललो. त्याच वेळी मी पक्षप्रमुख उद्धव ठाकरे यांना कळविले. अभिषेक असता तर त्याचे कान धरता आले असते; मात्र तेजस्वी निर्णय घेण्यासाठी स्वतंत्र आहे.
- विनोद घोसाळकर, माजी आमदार, शिवसेना (ठाकरे गट)