म्हाडाची अनधिकृत होर्डिंगना स्ट्रक्चरल ऑडिटसाठी नोटीस

म्हाडाची अनधिकृत होर्डिंगना स्ट्रक्चरल ऑडिटसाठी नोटीस
कागदपत्रेही सादर करण्याचे निर्देश

सकाळ वृत्तसेवा
मुंबई, ता. १५ : मुंबई शहर आणि उपनगरात म्हाडाच्या जागेवर ठिकठिकाणी ६० होर्डिंग आहेत. त्यापैकी जवळपास ५८ होर्डिंग अनधिकृत असून, त्यांनी म्हाडाचे ना हरकत प्रमाणपत्र घेतलेले नाही. त्यामुळे म्हाडाने संबंधित होर्डिंगधारकांना नोटीस पाठवत होर्डिंगचे स्ट्रक्चरल ऑडिट करण्याचे निर्देश दिले आहेत. तसेच स्ट्रक्चरल ऑडिटचा अहवाल आणि इतर कागदपत्रे सादर करण्यास बजावले आहे; अन्यथा कारवाई केली जाणार आहे.
म्हाडाच्या जागेवर होर्डिंग उभारताना संबंधितांनी म्हाडा प्राधिकरणाची एनओसी घेणे बंधनकारक असतानाही केवळ संबंधित गृहनिर्माण संस्था आणि पालिकेची परवानगी घेत होर्डिंग थाटली आहेत. वर्षभरापूर्वी अशी ६० अनधिकृत होर्डिंग म्हाडाच्या जागेवर होती. त्यापैकी दोनवर म्हाडाने कारवाई केली आहे. त्यानंतर म्हाडाने होर्डिंग धोरण तयार करीत मागील प्रभावाने भाडे भरणाऱ्या होर्डिंगचा परवाना अधिकृत करण्यासाठी अभय योजना जाहीर केली आहे. त्यानुसार होर्डिंगधारकांना सवलती मिळणार असतानाही अनेकांनी त्याला प्रतिसाद दिलेला नाही. त्यामुळे संबंधितांना नोटीस बजावत स्ट्रक्चरल ऑडिट करून अहवाल आणि इतर कागदपत्रे सादर करण्यास सांगितले आहे.