चोरट्यांकडून महिलेचे मंगळसूत्र लंपास

अंबरनाथ, ता. १५ (वार्ताहर) : पूर्वेकडील लोकनगरी रोड परिसरात रविवारी सायंकाळी वॉकिंग करत असलेल्या ५३ वर्षीय महिलेच्या गळ्यातील सोन्याचे मंगळसूत्र रिक्षातून आलेल्या तीन चोरट्यांनी हिसकावून नेल्याची घटना घडली आहे. याप्रकरणी शिवाजीनगर पोलिस ठाण्यात तिघांविरोधात गुन्हा दाखल करण्यात आला आहे.
अंबरनाथ पूर्व वडवली सेक्शन येथील मुरलीधर अपार्टमेंटमध्ये राहणाऱ्या हेमलता ढाके (वय ५३) या त्यांच्या पती व सोसायटीतील अन्य महिलांसोबत रविवारी सायंकाळी पाचच्या सुमारास लोकनगरी रोड परिसरात चालत होत्या. यावेळी एक अनोळखी रिक्षा त्यांच्याजवळ येऊन काही अंतरावर थांबली. रिक्षाच्या मागील सीटवर बसलेल्या दोन व्यक्तींपैकी एकाने त्यांच्या गळ्यातील सुमारे १७ ग्रॅम वजनाचे, अंदाजे ३५ हजार रुपये किमतीचे सोन्याचे मंगळसूत्र जबरीने खेचले. त्यानंतर तिघेही चोरटे रिक्षातून पळून गेले. या घटनेमुळे परिसरात भीतीचे वातावरण पसरले आहे. फिर्यादीच्या तक्रारीनुसार तिन्ही आरोपी साधारण २५ ते ३० वयोगटातील होते. या प्रकरणाचा पुढील तपास शिवाजीनगर पोलिस ठाण्याचे सहाय्यक निरीक्षक एम. व्ही. कोल्हे करत आहेत.