करंजुळे पाटील यांचे शिवसेनेला प्रत्युत्तर

अंबरनाथ (वार्ताहर) : शिवसेना आणि भाजप यांच्यातील आरोप-प्रत्यारोप अधिक तीव्र झाले आहेत. यंदा नगराध्यक्षपदाची निवडणूक थेट जनतेतून होत असल्याने शिवसेना, भाजप आणि मित्रपक्ष परस्परांविरुद्ध मैदानात उतरले आहेत. या निवडणुकीत अंबरनाथच्या राजकारणातील प्रभावी वाळेकर आणि करंजुळे पाटील ही दोन कुटुंबे समोरासमोर ठाकल्याने ही लढत प्रतिष्ठेची ठरली आहे. दरम्यान, रविवारी शिवसेनेतर्फे आयोजित पत्रकार परिषदेत कल्याण जिल्हा अध्यक्ष गोपाळ लांडगे यांनी भाजपवर घणाघाती टीका केली होती. या टीकेला भाजपचे नेते गुलाबराव करंजुळे पाटील यांनी तत्काळ प्रत्युत्तर दिले. ‘माझ्या कपाळावर थेट जनतेनेच टिळा लावला आहे. अंबरनाथच्या जनतेने मला निवडून दिले आहे. कोणत्याही पक्षाच्या टिळ्यावर नव्हे तर जनतेच्या पाठिंब्यावर मोठा झालो आहे’, असे प्रतिपादन त्यांनी केले. या आरोप-प्रत्यारोपांच्या राजकारणामुळे अंबरनाथमधील निवडणूक अधिकच रंगतदार होत चालली आहे.