महायुतीची घोषणेने कालानी गट अस्वस्थ

महायुतीचा कलानी गटाला धसका
‘शिंदे दरबारात’ मनधरणीसाठी धाव
उल्हासनगर, ता. १६ (वार्ताहर) : नागपूर अधिवेशनात भाजप आणि शिवसेना (शिंदे गट) यांच्यातील महायुतीवर अधिकृत शिक्कामोर्तब होताच उल्हासनगरच्या राजकारणात मोठे भूकंप झाले आहेत. या निर्णयामुळे ‘टीम ओमी कलानी’ आणि ‘साई पक्षा’समोर अस्तित्वाचे संकट उभे ठाकले असून, शहरातील राजकीय गणिते पूर्णपणे कोलमडली आहेत.

भाजप जिल्हाध्यक्ष राजेश वधारिया यांनी स्पष्ट केले, की प्रदेशाध्यक्ष रवींद्र चव्हाण यांच्या आदेशानुसार महायुती एकत्रित निवडणूक लढवणार आहे. खासदार डॉ. श्रीकांत शिंदे यांच्याशी यावर प्राथमिक चर्चा झाली असून, लवकरच जागावाटपासाठी निर्णायक बैठक पार पडणार आहे. यामुळे भाजप-शिवसेना कार्यकर्त्यांमध्ये उत्साह असला तरी मित्रपक्षांमध्ये अस्वस्थता पसरली आहे.

कलानींची राजकीय कोंडी
महायुतीची घोषणा होताच ओमी कलानी यांनी तातडीने ठाण्यातील शिंदे दरबारात धाव घेतल्याची चर्चा आहे. भाजपसोबत युती करू नये, यासाठी त्यांनी गळ घातल्याचे समजते. याचे मुख्य कारण म्हणजे युती झाल्यास कलानी गटाला अनेक प्रभागांतून माघार घ्यावी लागू शकते. तसेच भाजप सोडून कलानींकडे गेलेल्या नेत्यांची आता दुहेरी कोंडी झाली आहे.

अजित पवार गट स्वतंत्र लढणार?
एकूण घडामोडीत राष्ट्रवादी काँग्रेसला (अजित पवार गट) निवडणूक बैठकांपासून दूर ठेवल्याची माहिती समोर आली आहे. त्यामुळे हा गट उल्हासनगरमध्ये स्वतंत्रपणे नशीब अजमावण्याची शक्यता असून, महायुतीसमोर ते मोठे आव्हान ठरू शकते.

बंडखोरीची टांगती तलवार
महायुतीमुळे ज्यांना उमेदवारी नाकारली जाईल, ते इच्छुक उमेदवार उबाठा, काँग्रेस, मनसे किंवा प्रजा कृपा पार्टी यांसारख्या पर्यायांचा विचार करत आहेत. यामुळे आगामी महानगरपालिका निवडणूक केवळ सत्ता स्थापनेसाठी नसून ती शहरातील वर्चस्व टिकवण्याची आर-पारची लढाई ठरणार आहे.