अत्याचार प्रकरणात सश्रम कारावास

अत्याचार प्रकरणात सश्रम कारावास
नवी मुंबई, ता. १६ (वार्ताहर) ः पोलिस असल्याचे भासवून एका व्यक्तीने तरुणीवर बळजबरीने लैंगिक अत्याचार करणाऱ्याला बेलापूर जिल्हा व सत्र न्यायालयाने १० वर्षांचा सश्रम कारावास, पाच हजारांचा दंड ठोठावला आहे. वाशी सेक्टर १५ येथील शाळेजवळ फेब्रुवारीत हा प्रकार घडला होता.
मुंबई महापालिकेत बोर्ड सिक्युरिटी म्हणून काम करणाऱ्या सागर धुळपने २२ वर्षीय महाविद्यालयीन तरुणीला पोलिस असल्याची बतावणी करून पीडित तरुणीसह तिच्या मित्रावर गुन्हा दाखल करण्याची भीती दाखवली होती. तसेच घरी सर्व माहिती सांगण्याची धमकी दिली होती. आरोपीने पीडित तरुणीकडे ३० हजार रुपयांची मागणी केली; मात्र तरुणीकडे पैसे नसल्याचे लक्षात येताच आरोपीने तुर्भे येथे तिच्यावर बळजबरीने लैंगिक अत्याचार केला होता. त्यानंतर तिला घरी सोडून दिले होते; मात्र त्यानंतरही आरोपीने पीडित तरुणीकडे पैशांची मागणी करत मानसिक त्रास दिला होता. वाशी पोलिस ठाण्यात तक्रार दाखल केल्यानंतर भा.दं.वि. कलम ३७६ (बलात्कार), ३८४ (खंडणी) व १७० (पोलिस असल्याचे भासवणे)अंतर्गत गुन्हा दाखल होता. या खटल्याची सुनावणी बेलापूर सत्र न्यायालयात सुरू होती. सुनावणीदरम्यान १४ साक्षीदार तपासण्यात आले होते.