कळव्यात काँग्रेसच्या जनसंपर्क कार्यालयाचे उद्घाटन

कळव्यात काँग्रेसच्या जनसंपर्क कार्यालयाचे उद्घाटन
कळवा, ता. १६ (बातमीदार) : ठाणे महापालिका निवडणुकीच्या रणधुमाळीत काँग्रेस पक्षाने कळवा परिसरात आपली मोर्चेबांधणी वेगवान केली आहे. कार्यकर्त्यांना बळ देण्यासाठी आणि जुन्या कार्यकर्त्यांना पुन्हा सक्रिय करण्यासाठी कळवा ब्लॉक काँग्रेस अध्यक्ष राजू शेट्टी यांच्या पुढाकाराने टाकोली येथील पेटकर सोसायटीत काँग्रेसच्या नव्या जनसंपर्क कार्यालयाचे थाटात उद्घाटन करण्यात आले.

ठाणे शहर जिल्हा काँग्रेसचे अध्यक्ष ॲड. विक्रांत चव्हाण यांच्या हस्ते रविवारी (ता. १४) या कार्यालयाचे लोकार्पण करण्यात आले. या वेळी कळवा, खारेगाव आणि विटावा परिसरातील काँग्रेसचे ज्येष्ठ पदाधिकारी व कार्यकर्ते मोठ्या संख्येने उपस्थित होते. या जनसंपर्क कार्यालयाच्या माध्यमातून आगामी महापालिका निवडणुकीसाठी कार्यकर्त्यांमधील मरगळ दूर करून त्यांना पुन्हा निवडणूक प्रक्रियेत सक्रिय करण्याचा प्रयत्न केला जाणार आहे.

सामान्य नागरिकांच्या समस्या सोडवण्यासाठी थेट संपर्क केंद्र म्हणून हे कार्यालय काम करेल. कळवा आणि खारेगाव पट्ट्यात काँग्रेसची ताकद वाढवण्यासाठी या कार्यालयाचा मोठा उपयोग होईल, असा विश्वास या वेळी व्यक्त करण्यात आला. उद्घाटनप्रसंगी उपस्थित कार्यकर्त्यांनी घोषणाबाजी करत कळव्यात काँग्रेसचे अस्तित्व अधिक प्रबळ करण्याचा निर्धार व्यक्त केला.